Ma shingrüy qizilsugha bérip chégra mudapi'esini we ijtima'iy muqimliqni kücheytishni telep qilghan

Muxbirimiz erkin
2022-05-09
Share

Uyghur aptonom rayonluq partkomning sékrétari ma shingrüy 7-may küni qizilsu oblastining atush, ulughchat qatarliq jaylirini ziyaret qilghanda chégra mudapi'esini kücheytish we mustehkemleshni, bixeter ijtima'iy muqimliq muhiti berpa qilishni telep qilghan. Bu, xitayning Uyghurlar élidiki chong hoquqluq mezkur emeldarining yéqinqi bir aydin béri 2-qétim Uyghur élining chégra boyidiki sheher, nahiyelirini ziyaret qilip, chégrani qoghdashni kücheytishni tekitlishidur. Buning ‍aldida u xotenni ziyaret qilip, chégra mudapi'esini we ijtima'iy muqimliqni téximu qattiq kücheytishni tekitligen.

Ma shingrüyning néme üchün arqa-arqidin chégra rayon'gha bérip, chégra mudapi'esi we ijtima'iy muqimliqni tekitlishining sewebi melum emes. U ötken yili Uyghur aptonom rayonluq partkomning sékrétarliqigha yötkep kélin'gende xizmetning asasi nishanini iqtisadi tereqqiyatqa qaritidighanliqidin bésharet bergen. Bezi közetküchilerning éytishiche, uning arqa-arqidin xoten we qizil suni közdin kechürüp, chégrani qoghdashni tekitlishi xitayning ukra'ina urushi qizighan bir peytte hindistan chégrasi we waxan karidorining bixeterlikidin endishe qiliwatqanliqini körsitidiken.

Ma shingrüy atush, ulughchat qatarliq jaylarda qilghan sözide, shi jinpingning shinjanggha alaqidar bir qatar muhim söz we yolyoruqlirini, merkezning 3-qétimliq shinjang xizmet yighinining rohini, partiyening yéngi dewrdiki shinjangni idare qilish istratégiyesini toluq we toghra yolgha qoyup: “Pütün küch bilen dölet bixeterliki, ijtima'iy muqimliq we xelqning amanliqini qoghdashni kücheytish, chégrani kücheytish, chégra mudapi'esini mustehkemlesh we chégrani güllendürüp, xelqni béyitish, partiye 20-qurultiyining ghelibilik échilishi üchün bixeter we muqim siyasiy-ijtima'iy muhit berpa qilish kérek” dégen.

“Shinjang” gézitining éytishiche, ma shingrüy bu sepiride atush shehiridiki tekshürüsh ponkitlirini, süntagh yézisidiki saqchixana, ulughchatning jighan yézisidiki qirghizistan bilen bolghan chégrani tekshürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet