Ма шиңруйниң мақалиси уйғур дияридики бастурушниң йәниму давам қилидиғанлиқини җакарлиди

Мухбиримиз әзиз
2022-05-11
Share

Хитай һөкүмитиниң уйғур дияридики қирғинчилиқ қилмиши хәлқарада зор тәнқид вә қисмән җаза тәдбирлириниң оттуриға чиқишиға сәвәб болғандин кейин, уйғур аптоном районлуқ парткомниң секретари чен чуәнго 2021-йилиниң ахири вәзиписидин қалдурулуп, орниға гуаңдоң өлкисиниң башлиқи ма шиңруй ишқа қоюлған иди. Әмма униң хизмәткә чүшкән дәсләпки бирнәччә айда сөзлигән сөзлири нөвәттики сиясий тәдбирләрни изчил иҗра қилиштин бишарәт бәргән иди. 11-Май күни ма шиңруйниң намида “хәлқ гезити” вә шинхуа агентлиқиниң тор бәтлиридә елан қилинған “партийәмизниң йеңи дәврдики шинҗаңни идарә қилиш истратегийәсини толуқ вә тоғра иҗра қилайли” темисидики баш мақалиси хитай һөкүмити өткән бәш йилда изчил давам қилдуруп кәлгән бастуруш вә тутқун қилиш сияситиниң техиму қаттиқ иҗра болидиғанлиқини рәсмий һалда җакарлиди.

Баш мақалидә уйғур дияридики барлиқ сиясий хизмәтләрни хитай рәиси ши җинпиңниң “бир қоллуқ лайиһәлигәнлики вә орунлаштурғанлиқи, бу җайдики хизмәтниң сиясий җәһәттики йетәкчи идийәси, мәқсити вә буни әмәлгә ашурушниң чарилирини айдиңлаштуруп бәргәнлики” алаһидә тәкитләнгән. “партийәмизниң йеңи дәврдә шинҗаңни идарә қилиш истратегийәси” дәп нам берилгән бу истратегийәни ма шиңруй “бизниң буниңдин кейинки барлиқ хизмәтлиримизниң, иҗтимаий муқимлиқ вә узақ мәзгиллик әминлик бәрпа қилишниң қиблинамиси. Биз буни қәтий еғишмастин толуқ вә тоғра иҗра қилишимиз лазим,” дәп көрсәткән.

Ма шиңруй мақалисиниң “шинҗаңни мәдәнийәт арқилиқ озуқландурушта қәтий чиң туруп, идеологийә саһәсидики хизмәтләрни яхши ишләш” намлиқ үчинчи бөликидә, “идеологийә саһәсидики рәһбәрлик һоқуқини чиң тутуш; мәсулийәт түзүмини қәтий изчиллаштуруш; партийә башқурушидики тәшвиқат, партийә башқурушидики идеологийә вә партийә башқурушидики таратқуларни асасий еқимға айландуруш; шинҗаңдики һәр милләт хәлқидә ‛вәтән еңи‚, ‛җуңхуа миллити еңи‚, ‛җуңхуа мәдәнийити еңи‚ турғузуш; ‛җуңхуа классик оқушлуқлири қурулуши‚ вә ‛радийо-телевизийә сәрхил әсәрлири арқилиқ шинҗаңни мәдәнийәт арқилиқ озуқландуруш қурулуши‚ ни кәң көләмдә елип бериш”, шундақла аталмиш “җуңхуа кимлики асасидики милләт вә дин қаришини туруғузуш” ни оттуриға қойған.

Ма шиңруй нөвәттики “сиясий истратегийә” ни иҗра қилишни “шинҗаңни қанун бойичә идарә қилиш”, “иттипақлиқ вә инақлиқ арқилиқ шинҗаңниң муқимлиққа игә қилиш”, “хәлқ аммисиниң турмушини яхшилаш” дегәндәк шоарлар билән ниқаблиған болуп, радийомизниң мунасивәтлик зиярәтлири җәрянида һәрқайси мутәхәссисләр “иттипақлиқ” ниң уйғурлар шәртсиз реайә қилидиған түр икәнлики, “хәлқ аммиси” ниң уйғур дияриға көчүп кәлгән хитай аққунлирини көрситидиғанлиқини алаһидә тәкитлигән иди. Йерим йилдин буян уйғур дияридики һәрқайси вилайәт вә шәһәрләрни, шуниңдәк һәрқайси назарәт вә идариләрни бир-бирләп көздин кәчүрүп чиққан ма шиңруйниң мәзкур баш мақалиси нөвәттә униң бундин кейинки секретарлиқ хизмитини қандақ ада қилиш һәққидики вәдинамиси, дәп қаралмақта икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт