Ма шиңруй уйғур диярида “йешил муһит” яратмақчиму?

Мухбиримиз әзиз
2022.06.10
Share on WhatsApp
Share on WhatsApp

Уйғур аптоном районлуқ парткомниң секретари ма шиңруй йеқинда уйғур диярида муһит қурулушини яхшилап “йешил муһит” бәрпа қилиш һәққидә мәхсус сөз қилған. Шундақла буни “баш секретар ши җинпиңниң тәбрик сөзиниң роһи билән зич бирләштүргән һалда әмәлгә ашуруш” ни тәкитлигән.

Хитай һөкүмити башқурушидики “тәңритағ тори” ниң 10-июндики хәвиридә ейтилишичә, алдинқи күни чақирилған уйғур аптоном районлуқ парткомниң даимий һәйәтләр йиғинида ма шиңруй мәхсус сөз қилған. У сөзидә хитай рәиси ши җинпиңниң 5-июн күни “дуня муһит күни” мунасивити билән йоллиған тәбрик телеграммисида оттуриға қоюлған муһитниң муһимлиқи һәмдә йешил муһит бәрпа қилиш тоғрисидики сөзлириниң роһини, шуниңдәк “суң чиңлиң фонди” қурулғанлиқиниң 40 йиллиқи мунасивити билән йоллиған тәбрик телеграммисидики партийә тарихини яхши өгиниш һәққидики йолйоруқлирини қәтий изчиллаштурушни тәкитлигән. Шуниңдәк қанунчилиқ қурулушини күчәйтип “қанун һәммила җайни қаплиған вә һәммила җайда омумлашқан” вәзийәт яритиш лазимлиқини билдүргән.

Ма шиңрүй риясәтчилик қилған бу йиғинда “җуңхуа миллити ортақ гәвдиси” еңини күчәйтиш, исламни хитайчилаштурушни әмәлгә ашуруш қатарлиқлар йәнә тәкитләнгән.

Ма шиңруйниң муһит асраш, партийә тарихи вә қанунчилиқ қурулушидин ибарәт бир-биригә задила җипсилашмайдиған үч темини бир қетимлиқ йиғинда баравәр оттуриға қоюши буниң маһийәттә мәркизий һөкүмәтниң шоарини тәкрарлаштин башқа иш әмәсликини көрситип бериду, дәп қаралмақтикән. Йәнә бәзиләр болса ма шиңруйниң бу хил “илмий нәзәрийә” түсини алған шоарларни оттуриға қоюши униң юғури мәлуматлиқ сиясий рәһбәр икәнликиниң ипадилиниши, дәп қаримақтикән. Әмма хитай һөкүмитиниң өткән йерим әсирдә ғайәт зор көләмдә йәр асти байлиқи қезиш җәрянида уйғур дияриниң муһитини мислисиз вәйран қилип болғанлиқини, шуниңдәк милйонларчә уйғурни лагерларға қамап дунядики әң вәһшиянә қанунсизлиқниң үлгисини “тикләп бәргән” ликини әскәрткән мустәқил сиясий анализчи илшат һәсән “ма шиңруйниң докторлуқ унвани алғанлиқи һәргизму униң җаллатлиқта чен чуәнгоға йәтмәйдиғанлиқини көрсәтмәйду. Адолоф хитлерниң әң күчлүк ярдәмчиси болған җосеф геблес (Joseph Goebbels) му әдәбият пәнлириниң доктурлуқини алған җаллат иди” дәйду.

Дәрвәқә йеқинда паш болған “шинҗаң сақчи һөҗҗәтлири” намидики архипларму хитай мәркизий һөкүмити бекитип бәргән қирғинчилиқ һәққидики баш нишанниң чен чуәнго йөткәп кетилгәндин кейинму давамлиқ һалда иҗра қилинидиғанлиқини тәкитлигәниди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт