Ма шиңрүй қаримай нефитликини көздин кәчүрүп, нефит-тәбиий газ ишләпчиқиришни тәрәққий қилдурушни тәкитлигән

2022.08.03
Share on WhatsApp
Share on WhatsApp

Хитайчә “шинҗаң гезити” ниң хәвиридин мәлум болушичә, уйғур аптоном районлуқ парткомниң секретари ма шиңрүй, аптоном районниң рәиси әркин туняз қатарлиқлар 3-авғуст күни қаримай нефитликидә “тәкшүрүп тәтқиқ қилиш” елип барған; улар “шинҗаң нефит ширкити нефит қидириш вә ишләпчиқириш тәтқиқат орни” ға берип, нефит вә тәбиий газ мәнбәлириниң җуғрапийәлик җайлишиши, нефит мәһсулати ишләпчиқириш миқдари, һалқилиқ техникиларни қоллиниш дәриҗиси, шундақла нуқтилиқ қурулушларниң тәрәққият әһвалини игилигән.

Ма шиңрүй нефитлик мәсуллириға қилған сөзидә илғар техникиларни қоллинип, нефит қидириш вә қезиш салмиқини ашуруш, аллиқачан ечилған нефитлик вә тәбиий газ байлиқлиридин юқири үнүм билән пайдилиниш керәкликини тәкитлигән вә мундақ дегән: “қолимиздики енергийә байлиқини чиң тутуп, шинҗаңниң нефит вә тәбиий газ байлиқлирини техиму көп вә юқири сүпәттә қезишни һәссиләп ашуруп, дөлитимизни енергийә билән тәминләшкә капаләтлик қилишимиз керәк”.

Радийомизниң 21-июл күнидики хәвиридә, хитай нефит гуруһиниң тарим ойманлиқидики йиллиқ нефит вә тәбиий газ ишләпчиқириш миқдариниң 12 милйон тоннидин ешип кәткәнлики хәвәр қилинғаниди; шундақтиму уйғур районидин чиқидиған нефит хитайниң еһтияҗини қамдиялмайдиған болуп, русийәдин көп миқдарда нефит вә тәбиий газ елишқа моһтаҗ болған. Русийә украинаға һуҗум қилғандин кейин дуня миқясида шәкилләнгән енергийә кризиси америка вә башқа нурғун дөләтләрдә май баһасиниң бирақла өрләп кетишини кәлтүрүп чиқарған. Уйғур райони йиллардин бери хитайниң әң чоң енергийә амбири болуп кәлгәчкә, “әң муһим истратегийәлик җайи” ға айлинип қалған. Америкалиқ анализчи андерс кор радийомизға бәргән зияритидә, хитай һөкүмитиниң хитай нефит гуруһидәк чоң ширкәтләр вә биңтуән арқилиқ уйғур райониниң байлиқини булаң-талаң қиливатқанлиқини тилға елип өткәниди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.