Уйғур аптоном райониниң йеңи партком секритари ма шиңруй ши җинпиңниң сияситини давамлаштуридиғанлиқини билдүргән

Мухбиримиз әркин
2021-12-27
Share
Уйғур аптоном райониниң йеңи партком секритари ма шиңруй ши җинпиңниң сияситини давамлаштуридиғанлиқини билдүргән Уйғур районлуқ парткомниң секретари чен чүәнгониң орниға гуаңдуң өлкилик парткомниң муавин секретари вә өлкә башлиқи болған ма шиңрүйниң йөткәп келингән.
Photo: RFA

Хитайниң уйғур аптоном райониға йеңи тейинлигән партком секритари ма шиңруй ши җинпиңниң “шинҗаңни идарә қилиш сиясити” дә давамлиқ чиң турудиғанлиқини билдүргән.

“шинҗаң гезити” ниң хәвәр қилишичә, ма шиңруй 26-декабир йәкшәнбә күни райондики кадирларға қилған сөзидә ши җинпиңниң орунлаштурушни давамлиқ иҗра қилип, районда иҗтимаий муқимлиқ вә аммивий тәртипни изчил қоғдайдиғанлиқини ейтқан. Көзәткүчиләрниң ейтишичә, ма шиңруйниң бу сөзлири бәзи ғәрб дөләтлири, хәлқаралиқ мустәқил сот мәһкимиси вә кишилик һоқуқ тәшкилатлири тәрипидин “ирқий қирғинчилиқ” дәп әйибләнгән хитайниң “шинҗаң сиясити” дә бундин кейинму чоң өзгириш болмайдиғанлиқиниң бишарити икән.

Хитай компартийәси 25-декабир туюқсиз қарар чиқирип, уйғур аптоном районлуқ парткомниң секритари чен чуәнгониң буниңдин кейин бу вәзипини өтимәйдиғанлиқини елан қилған. Униң орниға гуаңдоң ‍өлкисиниң башлиқи ма шиңруйни йөткәп кәлгән. Чен чуәнго милйонлиған уйғурларниң лагер, вә түрмиләргә қамилиши, мәҗбурий әмгәккә селиниши, уйғур аилилириниң вәйран қилиниши, уйғур аяллириниң туғмас қилинп, уйғур нупусиниң “пиланлиқ, систимелиқ вә мәқсәтлик” азайтилишида ойниған роли сәвәблик хәлқарада җавабкарлиққа тартиш чуқанлилири күнсайин күчийиватқан бир вақитта вәзиписидин айрилған.

“шинҗаң гезити” ниң ейтишичә, ма шиңруй 26-декабир ачқан тунҗи кадирлар йиғинида, “биз шинҗаң җәмийитидики узун муддәтлик муқимлиқни қәтий сақлишимиз керәк. Асанға тохтимиған бу муқимлиқни арқиға қайтурушқа йол қоймаслиқимиз лазим” дегән. У сөзиниң мутләқ көп қисмида ши җинпиң идийәсини вә униң “шинҗаңни идарә қилиш пилани” ни давамлиқ иҗра қилидиғанлиқи, “юқури сүпәтлик иқтисади тәрәққиият” ни алға сүрүдиғанлиқини қәйт қилған. Бирақ у конкирет иҗраатлар тоғрисида тәпсилий тохталмиған.

62 яшлиқ ма шиңруй америка президенти җов байден ‍уйғур районида ишләпчиқирилған мәҗбурий әмгәк мәһсулатлирини чәкләш тоғрисидики “уйғур мәҗбури әмгикиниң алдини елиш қанун лайиһәси” гә имза қоюп, уни рәсмий қанунға айландуруған бир вақитта партком секритарлиқиға йөткәп келингән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт