Mutexessisler kanada hökümitini Uyghur élidiki emeldarlarni "Magnétskiy qanuni" arqiliq jazalashqa chaqirmaqta

Muxbirimiz irade
2019-05-16
Élxet
Pikir
Share
Print

Kanadaliq mutexessisler kanada hökümitini xitayning Uyghur élidiki chén chüen'go we shöhret zakir qatarliq emeldarlirini "Magnétskiy qanuni" boyiche jazalashqa chaqirghan.

Kanadaning "Dölet pochtisi" gézitining bu heqtiki xewiride xitay hökümitining Uyghur élida 2 milyondek Uyghurni lagérgha qamash arqiliq ularning tili we dinigha hujum qiliwatqanliqi, buning del kanada hökümiti kishilik hoquqni depsende qiliwatqan diktator hakimiyetlerni jazalash üchün tüzgen "Magnétskiy qanuni" boyiche jazalinishi zörür bolghan bir heriket ikenlikini ilgiri sürgen. 

Xewerde körsitilishiche, kanadaliq mutexessisler yuqiriqi bu qanun tüzülgili 18 ay bolghan bolsimu, emma hazirghiche birermu xitay emeldarining qara tizimlikke élinmighanliqini tenqid qilghan. Ular birdek kanada hökümitini emdi pozitsiyisini jiddiy özgertishke chaqirghan. 

Kanadadiki ottawa uniwérsitétining qanun penliri proféssori érol mendes "Dölet pochtisi" gézitige qilghan sözide xitay hökümitining Uyghurlargha qiliwatqan zulumi insaniyetke qarshi bir jinayettur. Biz héch bolmighanda bu qanun arqiliq buninggha taqabil turushimiz kérek," dégen. 

U yene bu qanunni ijra qilghanda xitayning öch alidighanliqini eskertip, "Eger biz hélihem ikkinchi dunya urushi mezgilidiki pozitsiyimizni qoghdap qalimiz deydikenmiz, u halda biz uning bedilini tölishimiz we uning qayta yüz bérishige yol qoymasliqimiz kérek," dégen. 

Kanadaning tashqi ishlar ministiri kirstiya firilendning bayanatchisi adam astin bu gézitke qayturghan inkasida kanada tashqi ishlar ministirliqining her pursette xitay hökümitige Uyghurlarning kishilik hoquqi mesilisini tilgha éliwatqanliqini bildürgen biraq u kanada hökümitining Uyghur élidiki xitay emeldarlirigha qarita jaza tedbiri chiqarghan yaki chiqarmaydighanliqi heqqide gep qilmighan. 

Xewerde bayan qilinishiche, mutexessisler nurghun xitay emeldarlarning kanadagha yötkep kéliwalghan mal-mülükliri bar bolghachqa, eger kanada "Magnétskiy qanuni" ni yolgha qoyghan teqdirde buning choqum tesiri bolidighanliqini mölcherlimektiken. 

Kanadaning béyjingda turushluq sabiq diplomati we xitay ishliri mutexessisi charlés burtun kanadani tedbir élishqa chaqirip "Kanada hökümiti xitaygha qarshi küchlük turushi kérek, shundila xitay kanadadin eyminidighan bolidu" dégen.

Toluq bet