Маһирә яқупниң қолға елиниши дөләтлик радийоға елип чиқилди

Мухбиримиз әзиз
2020-06-03
Елхәт
Пикир
Share
Принт

Хитай һөкүмитиниң уйғурлар дияридики сиясий бастуруш һәрикити җәрянида тутқун қилинған һәмдә бир йилдин буян һечқандақ хәвири болмайватқан маһирә яқупниң австралийәдики уруқ-туғқанлири бу мәсилини австралийәдики әң чоң ахбарат васитиси болған «австралийә дөләтлик радийо ширкити» ниң программиси арқилиқ техиму көп кишиләргә аңлатти.

Мәлум болушичә маһирә яқуп 2013-йили австралийәдики ата-анисиниң өй сетивелиш ишлириға ярдәмлишиш үчүн уларға хитайдин пул селип бәргән. 2019-Йили майда хитай һөкүмити уни «террорлуқ һәрикитигә малийә җәһәттин ярдәмләшкән» дегән әйиб билән қолға алған.

«Австралийә дөләтлик радийо ширкити» ниң 2-июн күни тарқитилған аңлитишида хәлқара кәчүрүм тәшкилати австралийә шөбисиниң директори саманса клинворс, маһирә яқупниң қериндиши мәрһаба яқуп вә австралийә истратегийилик сиясәт институтиниң анализчиси викий шү уйғурларниң һазирқи вәзийитигә бағлиған һалда маһирә яқуп дуч кәлгән паҗиәни муһакимә қилди.

Сөһбәтттә улар уйғурлар дияридики зор тутқунниң әһвали һәмдә бу җәрянда милйонлиған уйғурурниң «қайта тәрбийәләш мәркизи» намидики лагерларға қамилиш әһвалини чөридигә һалда маһирәниң илгири бир қетим тутқун қилинип қоюветилгәнлики вә 2019-йили рәсмий қолға елиниши, хитай һөкүмитиниң хәлқараға уйғурларни қандақ қилип террорчи сияқида тонуштуруватқанлиқи қатарлиқларни әскәртип өтти.

Саманса ханим болса хитай һөкүмитиниң маһирә һәққидики әйибләшлириниң һечқандақ асаси йоқ икәнликини вә хитай һөкүмитиниң уйғурларни бастуруш үчүн бир қатар нормал паалийәтләрни әсәбийлик дәриҗисигә көтүрүп чиққанлиқини сөзләп өтти. «Сетиливатқан уйғурлар» намлиқ доклатниң апторлириниң бири болған вики шү болса нөвәттә чәтәл билән хизмәт, саяһәт яки оқуш дегәндәк алақиси болғанлики уйғурниң бирдәк тутқун қилиниватқанлиқини, маһирәниң әнә шу долқундики бир шәхс икәнликини тәкитләп өтти.

Программиниң ахирида маһирәниң бигунаһ һалда қолға елинишиға қарита австралийә һөкүмитиниң игә чиқиши лазимлиқи һәққидики чақириқ йәнә бир қетим оттуриға қоюлди. Буниңдин илгири болса хәлқара кәчүрүм тәшкилати бу һәқтә мураҗиәтнамә елан қилған иди.

Пикирләр (0)
Share
Толуқ бәт