Malayshiyadiki islam tetqiqat orni malayshiyaning Uyghur musapirlirini qoghdishini telep qildi

Muxbirimiz erkin
2018.03.02

Malayshiyadiki bir islam tetqiqat orni malayshiya hökümitining herqandaq bedelge qarimay Uyghur musapirlirini qoghdishi kéreklikini tekitligen.

2017‏-Yili 11‏-ayda tayland türmisidin qéchip malayshiyagha ötüp ketken Uyghur musapirliridin az dégende 11 nepiri bu yil 1‏-ayda malayshiya saqchilirigha tutulup qalghan. Xitay hökümiti malayshiyadin derhal tutqunlarni özlirige qayturup bérishni telep qilghan.

Lékin amérika hökümiti, xelq'ara kishilik hoquq teshkilatliri, malayshiyadiki adwokatlar jem'iyiti we islami jama'etler malayshiya hökümitidin Uyghur musapirlirini xitaygha qayturmasliqni telep qilghan idi.

Sin'gaporda chiqidighan “Asiya waqti” torining xewiridin melum bolushiche, malayshiyadiki “Islami oyghinish fronti” namliq islam tetqiqat ornining bashliqi exmet faruq musa munularni tekitligen: “Eger bu Uyghurlar xitay kompartiyesining siyasiy jazasidin qéchip chiqqan bolsa, bu gerche xitayning naraziliqini qozghisimu, hetta malayshiya hökümiti xitaygha qerz bolup qalghan teqdirdimu, herqandaq bedelge qarimay ularni qoghdishi kérek.”

Malayshiya “Islamiy oyghinish fronti” din burun malayshiya adwokatlar jem'iyiti bayanat élan qilip, malayshiya hökümitini Uyghur musapirlirini qayturmasliqqa chaqirghan. Mezkur organ malayshiya hökümitining xelq'ara qanunlargha emel qilish mejburiyiti barliqini tekitligen.

Exmet faruq musa sözide yene Uyghur musapirlirigha adil sehne yaritip bérilishini, hökümet ularni herqandaq bir döletke ötküzüp bérishtin burun ularning térrorluqqa rastinla chétishliq yaki chétishliq emeslikini ispatlishi kéreklikini tekitligen. Uning körsitishiche, eger malayshiya da'iriliri Uyghur musapirlirini xitaygha qayturup berse, bu saylam harpisida özlirini islamning qoghdighuchisi, dep tonutuwatqan malayshiya hökümitige ziyanliq iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.