Уйғур тәшкилатлири малайшия һөкүмитигә очуқ мәктуп йоллиди

Мухбиримиз әзиз
2018-02-13
Share

Өткән һәптә тайланд түрмисидин қечип чиққандин кейин нурғун әгри-тоқай йолларни бесип малайшияға йетип барған уйғур қачқунлиридин 11 кишини малайшия сақчилири қолға алғанлиқ һәққидики хәвәр тарқалған иди. Шуниңдин кейин дуняниң һәрқайси җайлиридики уйғур тәшкилатлири вә башқа хәлқаралиқ тәшкилатлар малайшия һөкүмитигә чақириқ қилип, бу уйғурларни хитайға қайтурмаслиқни тәләп қилди.

12-Феврал күни муһаҗирәттики уйғур пуқравий тәшкилатлири малайшия һөкүмитигә йоллинидиған коллектип очуқ хәткә имза қойди. Мәзкур очуқ хәт түрлүк сәвәбләрни көздә тутқан һалда уйғурчә, инглизчә, әрәбчә вә малай тиллирида йезилған. Униңда алди билән бу уйғурларниң немә үчүн хитайдин қечип чиққанлиқи һәққидә омуми чүшәнчә берилиду, андин нөвәттики вәзийәттә бу уйғурлар хитайға қайтурулса уларға өлүмдин башқа йол йоқлуқи шәрһилиниду.

Мәзкур хәттә йәнә уйғурлар дияриниң һазирқи әһвали ихчам қилип, «шәрқий түркистан райони һазир мусулман уйғурлири үчүн үсти очуқ түрмигә айланди» дәп тәсвирлиниду. Шундақла өзлирини мусулманлар дунясиға йетип кәлдуқ, дәп ойлиған уйғур қачқунлириниң хитайға қайтурулушни һәргиз халимайдиғанлиқи, уларниң хитай һөкүмитиниң қолида қийнилип өлүп кәткинидин малайшияда һаятини ахирлаштуруши әвзәл икәнлики, буниңда уларниң һечболмиғанда мусулманлар қәбристанлиқиға дәпнә қилиништин мәһрум қалмайдиғанлиқи ейтилиду. Очуқ хәттә бу тоғрилиқ: «бу 11 нәпәр уйғур қериндишимизни шеһит қилиш җәрянида сәрп қилған барлиқ иқтисадий чиқимлар вә төләшкә тегишлик төләмләр болса, һәммини биз үстимизгә елип төләшкә тәйярмиз» дейилгән.

Мәзкур очуқ хәт тоғрилиқ қилған пикир қилған муһаҗирәттики уйғурлар «бу очуқ хәттә нәқ уйғурларниң йүрикидики гәпләр ейтилған. Бу вәқә бизни йәнә бир қетим иттипақлиқ һәққидә ойлинишқа үндимәктә» деди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт