Малайсия вә һиндонезийә мухбирлири уйғурлар диярини зиярәт қилған

Мухбиримиз әзиз
2019.02.26
Share on WhatsApp
Share on WhatsApp

Йеқинда хитай һөкүмити бир түркүм чәтәл дипломатлирини лагерларни екскурсийә қилишқа тәшкиллигәндин кейин, малайсия вә һендонезийәдин кәлгән 11 мухбир 23-февралдин башлап үрүмчи, атуш, қәшқәр вә хотән қатарлиқ җайларда зиярәттә болған.

Хитайниң “йәр шари вақти гезити” ниң 25-февралдики хәвиридә ейтилишичә, мухбирлар гурупписи бу җайларда мәктәпләр, мәсчитләр вә “тәрбийәләш мәркәзлири” ни көздин кәчүргән. Уларниң зиярити җәрянида абдуреқип төмүрнияз қатарлиқ ислам “өлималири” уйғурлар диярида қанунлуқ диний етиқад әркинликиниң толуқ капаләткә игә икәнлики һәққидә мәлумат бәргән.

Буниңдин бир һәптә илгири хитай һөкүмитиниң ташқи ишлар министирлиқи пакистан, мисир, русийә, куба, венезуела қатарлиқ сәккиз дөләтниң җәнвәдики вәкиллирини вә бир қисим дипломатларни уйғурлар дияридики “кәспий тәрбийәләш мәркәзлири” ни екскурсийә қилишқа тәшкиллигән иди.

Хәвәрләрдин мәлум болушичә, бу вәкилләргә бирдәк уйғурлар диярида “әсәбийлик вә террорлуқ” әвҗ алғанлиқтин ашу хил идийәләр билән “юқумланған” кишиләрни “тәрбийәләш” кә тоғра кәлгәнлики, буниң уларниң кәлгүси истиқбали үчүн иҗабий роли болидиғанлиқи тәшвиқ қилинған.

Һалбуки, хитай һөкүмитиниң чәтәл дипломатлири вә мухбирлири үчүн қандақ сахта мәйдан һазирлаватқанлиқи, хәлқараниң көзини бояш үчүн қандақ усулларни ишқа селиватқанлиқи һәққидә түрлүк мәлуматлар оттуриға чиқиватқан болуп, анализчилар “хитай һөкүмитиниң бу қилмиши худди қуяшни етәк билән йепишқа урунғанға охшайду. Улар бундақ аддий усуллар арқилиқ дуняни алдаш мәқситигә йетәлмәйду” деди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт