Хитай "11 нәпәр уйғурни қайтуруп беришни тәләп қилишимиз орунлуқ", деди

Мухбиримиз ирадә
2018-02-12
Share

Хитайниң "йәр шари вақти" гезити малайшиядин 11 нәпәр уйғурни қайтуруп беришини тәләп қилишиниң орунлуқ икәнликини илгири сүрди.Хитай һөкүмәт авази һесаблинидиған  "йәр шари вақти" гезити 11-феврал күни елан қилған обзорида, хитай һөкүмитиниң нөвәттә малайсия һөкүмитидин 11 нәпәр уйғурни қайтуруп беришни тәләп қиливатқанлиқини вә буниң интайин йоллуқ бир тәләп икәнликини баян қилған.

Улар, юқиридики бу уйғурларниң чеградин қанунсиз өткәнлики вә террор тәшкилатлириға четишлиқ болуш еһтимали барлиқини илгири сүрүп туруп, "башқа һәрқандақ ғәрб дөлити юқиридикидәк әһвалда чоқум бизгә охшаш йол тутқан болатти.Шуңа ғәрб һөкүмәтлири хитайниң малайшиядин 11 нәпәр уйғурни тәләп қилишиға қарита ‹икки хил өлчәм' қоймаслиқи керәк" дәп язған.  

Ройтерс агентлиқи тайландтин қачқандин кейин малайшияда қолға чүшүп қалған 11 нәпәр уйғурниң хитайға қайтурулуш хәвпи астида туруватқанлиқини хәвәр қилғандин кейин америка дөләт ишлири министирлиқи вә хәлқара кишилик һоқуқни көзитиш тәшкилати һәм шундақла дуня уйғур қурултийи қатарлиқлар баянат елан қилип, малайшиядин уйғурларни қайтуруп бәрмәсликкә чақирған шундақла хитайниң бу тәлипиниң хәлқара қанунларға хилаплиқини билдүргән иди.

Әмма "йәр шари вақти" гезити обзорида ләнҗу университетидики җу юңбяв исимлик бир йетәкчиниң сөзини нәқил елип туруп, "хитайниң бу һәрикитиниң қанунларға уйғунлуқини вә бу уйғурлар қайтуруп келингәндин кейин уларниң хитай қанунлириға асасән адиллиқ билән бир тәрәп қилинидиғанлиқи" ни илгири сүргән. Һалбуки, кишилик һоқуқни көзитиш тәшкилати җүмә күнидики баянатида, һазирғичә тайланд, камбоджа қатарлиқ дөләтләрдин хитайға қайтуруветилгән һечқандақ бир уйғурниң ақивитидин хәвәр елиналмиғанлиқини, уларниң қейин - қистақ вә түрмә җазасиға учриған болушиниң муқәррәрликини билдүргән иди.

Малайсия һөкүмәт тармақлири бүгүн елан қилған бир хәвиридә, уйғурларни қайтуруп - қайтурмаслиқниң малайшияниң өз ихтияри икәнликини илгири сүрүш арқилиқ, уйғурларниң тәқдиригә көңүл бөлүватқанларни җиддий әндишигә салди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт