Xitay "11 Neper Uyghurni qayturup bérishni telep qilishimiz orunluq", dédi

Muxbirimiz irade
2018-02-12
Share

Xitayning "Yer shari waqti" géziti malayshiyadin 11 neper Uyghurni qayturup bérishini telep qilishining orunluq ikenlikini ilgiri sürdi.Xitay hökümet awazi hésablinidighan  "Yer shari waqti" géziti 11-féwral küni élan qilghan obzorida, xitay hökümitining nöwette malaysiya hökümitidin 11 neper Uyghurni qayturup bérishni telep qiliwatqanliqini we buning intayin yolluq bir telep ikenlikini bayan qilghan.

Ular, yuqiridiki bu Uyghurlarning chégradin qanunsiz ötkenliki we térror teshkilatlirigha chétishliq bolush éhtimali barliqini ilgiri sürüp turup, "Bashqa herqandaq gherb döliti yuqiridikidek ehwalda choqum bizge oxshash yol tutqan bolatti.Shunga gherb hökümetliri xitayning malayshiyadin 11 neper Uyghurni telep qilishigha qarita 'ikki xil ölchem' qoymasliqi kérek" dep yazghan.  

Roytérs agéntliqi taylandtin qachqandin kéyin malayshiyada qolgha chüshüp qalghan 11 neper Uyghurning xitaygha qayturulush xewpi astida turuwatqanliqini xewer qilghandin kéyin amérika dölet ishliri ministirliqi we xelq'ara kishilik hoquqni közitish teshkilati hem shundaqla dunya Uyghur qurultiyi qatarliqlar bayanat élan qilip, malayshiyadin Uyghurlarni qayturup bermeslikke chaqirghan shundaqla xitayning bu telipining xelq'ara qanunlargha xilapliqini bildürgen idi.

Emma "Yer shari waqti" géziti obzorida lenju uniwérsitétidiki ju yungbyaw isimlik bir yétekchining sözini neqil élip turup, "Xitayning bu herikitining qanunlargha uyghunluqini we bu Uyghurlar qayturup kélin'gendin kéyin ularning xitay qanunlirigha asasen adilliq bilen bir terep qilinidighanliqi" ni ilgiri sürgen. Halbuki, kishilik hoquqni közitish teshkilati jüme künidiki bayanatida, hazirghiche tayland, kambodzha qatarliq döletlerdin xitaygha qayturuwétilgen héchqandaq bir Uyghurning aqiwitidin xewer élinalmighanliqini, ularning qéyin - qistaq we türme jazasigha uchrighan bolushining muqerrerlikini bildürgen idi.

Malaysiya hökümet tarmaqliri bügün élan qilghan bir xewiride, Uyghurlarni qayturup - qayturmasliqning malayshiyaning öz ixtiyari ikenlikini ilgiri sürüsh arqiliq, Uyghurlarning teqdirige köngül bölüwatqanlarni jiddiy endishige saldi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet