Америка дөләт ишлири министирлиқи малайшия һөкүмитини 11 нәпәр уйғурни хитайға қайтурмаслиққа чақирди

Мухбиримиз ирадә
2018-02-15
Share

Америка дөләт ишлири министирлиқи малайшияни 11 нәпәр уйғурниң хитайға қайтурулуш мәсилисидә йәнә бир қетим агаһландурди. Бирләшмә агентлиқиниң хәвиридин қариғанда, 15- феврал пәйшәнбә күни, америка дөләт ишлири министирлиқиниң баянатчиси майкил кәйвий баянат берип, малайшия һөкүмитини 11 нәпәр уйғурни хитайға қайтурмаслиққа, уларниң һоқуқлириға капаләтлик қилишқа чақирди. У сөзидә, "малайшия һөкүмити 11 нәпәр уйғурни б д т панаһланғучилар ишханиси тәрипидин рәсмий тизимға елинип, үчинчи бир дөләткә бихәтәр орунлаштурулғичә уларниң бихәтәрликигә капаләтлик қилиши керәк," дегән.

Америка дөләт ишлири министирлиқиниң баянатчиси бу уйғурлар хитайға мәҗбурий қайтурулған тәқдирдә уларниң хитайда қейин -қистаққа вә қамақ җазасиға учриши мумкинликини әскәрткән.

Бүгүн йәнә малайшия адвокатлар бирлики рәсмий баянат елан қилип, малайшия һөкүмитини 11 нәпәр уйғурни хитайға қайтурмаслиққа чақирди. Мәзкур баянат малайшия адвокатлар бирликиниң рәиси җорҗи варгус тәрипидин елан қилинған болуп, у малайшия һөкүмитини хәлқаралиқ қанунларға әмәл қилип, 11 нәпәр уйғурни хитайға қайтуруштин дәрһал ваз кечишкә чақирған.

Баянатта мундақ дейилгән: "малайшия һөкүмити 2011-йили авғусттиму малайшияға қечип кәлгәндин кейин б д т ниң панаһланғучилар ишханисиға мураҗиәт қилип болған уйғур мусапирларни хитайға қайтурувәткән иди. Шу чағда қайтуруветилгән 11 уйғурниң ақивитиниң немә болғанлиқи һазирғичә ениқ әмәс. Биз адвокатлар бирлики малайшия һөкүмитини охшаш вәқәни қайта тәкрарлимаслиққа чақиримиз. . . Малайшия һөкүмити кәлгән дөлитигә қайтурған тәқдирдә еғир палакәткә учрайдиған бу кишиләр алдидики қануний вә инсаний мәҗбурийитини көрмәсликкә салмаслиқи керәк."

Өткән йили 11‏-айда тайландниң малайшия чеграсиға йеқин бир мусапирлар лагеридин қечип кәткән уйғурлардин 11‏ киши өткән айниң ахирлири малайшия аманлиқ күчлириниң қолиға чүшүп қалған иди. Ройтерс агентлиқи әш дәсләп хитай һөкүмитиниң бу 11 нәпәр уйғурни қайтуруп беришни тәләп қиливатқанлиқини ашкарилиғандин кейин, америка дөләт ишлири министирлиқи вә хәлқара кишилик һоқуқни көзитиш тәшкилати қатарлиқ органлар малайшияни хитайниң тәлипигә көнмәсликкә чақирған.

Малайшия һөкүмити хитай билән малайшия икки дөләт арисида җинайәтчиләрни өткүзүп беришкә аит келишимниң барлиқини илгири сүрүп, бу 11 нәпәр уйғурни қайтуридиғанлиқини билдүргән иди. Малайшия адвокатлар бирлики өз баянатида малайшия һөкүмитини юқириқи бу келишимниң кәйнигә йошурунивалмаслиққа чақирған. Улар, "уйғурларниң мәсилиси сиясий мәсилә вә етник мәсилә болғанлиқтин юқириқи бу келишим уйғурларни хитайға қайтуруп беришкә қануний асас болалмайду," дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт