Amérika dölet ishliri ministirliqi malayshiya hökümitini 11 neper Uyghurni xitaygha qayturmasliqqa chaqirdi

Muxbirimiz irade
2018-02-15
Share

Amérika dölet ishliri ministirliqi malayshiyani 11 neper Uyghurning xitaygha qayturulush mesiliside yene bir qétim agahlandurdi. Birleshme agéntliqining xewiridin qarighanda, 15- féwral peyshenbe küni, amérika dölet ishliri ministirliqining bayanatchisi maykil keywiy bayanat bérip, malayshiya hökümitini 11 neper Uyghurni xitaygha qayturmasliqqa, ularning hoquqlirigha kapaletlik qilishqa chaqirdi. U sözide, "Malayshiya hökümiti 11 neper Uyghurni b d t panahlan'ghuchilar ishxanisi teripidin resmiy tizimgha élinip, üchinchi bir döletke bixeter orunlashturulghiche ularning bixeterlikige kapaletlik qilishi kérek," dégen.

Amérika dölet ishliri ministirliqining bayanatchisi bu Uyghurlar xitaygha mejburiy qayturulghan teqdirde ularning xitayda qéyin -qistaqqa we qamaq jazasigha uchrishi mumkinlikini eskertken.

Bügün yene malayshiya adwokatlar birliki resmiy bayanat élan qilip, malayshiya hökümitini 11 neper Uyghurni xitaygha qayturmasliqqa chaqirdi. Mezkur bayanat malayshiya adwokatlar birlikining re'isi jorji wargus teripidin élan qilin'ghan bolup, u malayshiya hökümitini xelq'araliq qanunlargha emel qilip, 11 neper Uyghurni xitaygha qayturushtin derhal waz kéchishke chaqirghan.

Bayanatta mundaq déyilgen: "Malayshiya hökümiti 2011-yili awghusttimu malayshiyagha qéchip kelgendin kéyin b d t ning panahlan'ghuchilar ishxanisigha muraji'et qilip bolghan Uyghur musapirlarni xitaygha qayturuwetken idi. Shu chaghda qayturuwétilgen 11 Uyghurning aqiwitining néme bolghanliqi hazirghiche éniq emes. Biz adwokatlar birliki malayshiya hökümitini oxshash weqeni qayta tekrarlimasliqqa chaqirimiz. . . Malayshiya hökümiti kelgen dölitige qayturghan teqdirde éghir palaketke uchraydighan bu kishiler aldidiki qanuniy we insaniy mejburiyitini körmeslikke salmasliqi kérek."

Ötken yili 11‏-ayda taylandning malayshiya chégrasigha yéqin bir musapirlar lagéridin qéchip ketken Uyghurlardin 11‏ kishi ötken ayning axirliri malayshiya amanliq küchlirining qoligha chüshüp qalghan idi. Roytérs agéntliqi esh deslep xitay hökümitining bu 11 neper Uyghurni qayturup bérishni telep qiliwatqanliqini ashkarilighandin kéyin, amérika dölet ishliri ministirliqi we xelq'ara kishilik hoquqni közitish teshkilati qatarliq organlar malayshiyani xitayning telipige könmeslikke chaqirghan.

Malayshiya hökümiti xitay bilen malayshiya ikki dölet arisida jinayetchilerni ötküzüp bérishke a'it kélishimning barliqini ilgiri sürüp, bu 11 neper Uyghurni qayturidighanliqini bildürgen idi. Malayshiya adwokatlar birliki öz bayanatida malayshiya hökümitini yuqiriqi bu kélishimning keynige yoshuruniwalmasliqqa chaqirghan. Ular, "Uyghurlarning mesilisi siyasiy mesile we étnik mesile bolghanliqtin yuqiriqi bu kélishim Uyghurlarni xitaygha qayturup bérishke qanuniy asas bolalmaydu," dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet