Малайсия һөкүмити уйғурларниң мәсилисигә көңүл бөлүшкә чақирилди

Мухбиримиз ирадә
2019-05-28
Елхәт
Пикир
Share
Принт

«Малайсия йәрликләр иттипақи» йәни қисқичә атилиши «бәрсату» намлиқ сиясий партийәниң омумий кеңәш әзаси, истратегийә тәтқиқатчиси раис һуссин һәрқайси дөләтләрни вә малайсия һөкүмитини уйғурларниң вәзийитигә көңүл бөлүшкә чақирди.

Доктор раис һуссин бу чақириқини малайсиядики нопузлуқ гезитләрдин болған «малайсиякини» гезитидә елан қилған «хитай уйғурларға қаратқан қайта тәрбийә лагерлирини етирап қилидиған вақит кәлди» мавзулуқ мақалисидә қилған.

У мақалисидә, хитайда мәдәнийәт инқилаби мәзгилидә зиялийларға қандақ зәрбә берилгән болса, һазирму уйғур зиялийлириниң хитай һөкүмитиниң еғир зәрбә нишаниға айланғанлиқини, уйғурларниң дини әқидиси сәвәблик террорчидәк муамилигә учраватқанлиқини баян қилған.

У, хитай һөкүмитиниң алаһазәл 2 милйон уйғурни лагерларға қамиғанлиқини етирап қилишла әмәс, бәлки уни аяғлаштуридиған вақти кәлгәнликини әскәрткән.

Доктор раис һуссин сөзидә: «дуня җамаәтчилики һазирқи заманиви дуняда пәйда болған вә вәһший натсист лагерлириға охшайдиған бу лагерларға қарши дәс туруши керәк. Малайсия һөкүмитиму хитайниң чекидин ашқан сиясәтлирини аяғлаштуруши үчүн тегишлик мәҗбурийәтни ада қилиши керәк» дәп язған.

Малайсия һөкүмити уйғур мәсилисидә малайсиядики кишилик һоқуқ органлириниң вә бир қисим партийәләрниң бесимиға учрап кәлмәктә. Өткән ай малайсия ташқи ишлар министири сәйфидин абдулла «җәнубий хитай сәһири гезити» ниң зияритини қобул қилғанда: «биз әһвални чүшинимиз. Уйғурларниң әһвалини йеқиндин көзитиватимиз. Шундақла бейҗиңға бизниң бу мәсилигә әстайидил муамилә қиливатқанлиқимизни билдүрүп келиватимиз» дегән иди.

Пикирләр (0)
Share
Толуқ бәт