Малайсия ислам мәслиһәт кеңиши: «абдурәқип туниязниң сөзлирини рәт қилимиз»

Мухбиримиз әркин
2019-06-24
Елхәт
Пикир
Share
Принт

Малайсиядики бир исламий тәшкилатниң рәһбири моһди азни абдул һамид «шинҗаң ислам институти» ниң мудири абдурәқип абдуниязниң өткән һәптә малайсияни зиярәт қилған чағдики сөзлиригә инкас билдүрүп, униң сөзлирини рәт қилидиғанлиқини ейтқан. «Хәвәр нида» намлиқ торниң малайсия таратқулириниң учурлирини нәқил кәлтүрүп бәргән хәвиридә қәйт қилинишичә, моһди азми абдул һамид «уйғур етник гуруппилири, өзлириниң қолға елинмайватқанлиқи вә уйғур мусулманлириниң ислам динида чәклимисиз, әркин ибадәт қиливатқанлиқини билдүрмигүчә абдурәқипниң контрол астидики баянлирини рәт қилимиз» дегән.

Абдурәқип абдунияз өткән һәптә хитай вәкилләр өмикиниң тәркибидә малайсияни зиярәт қилған. Куалаломпурдики хитай әлчиханисида өткүзүлгән ахбарат йиғинида, хитай һөкүмитиниң уйғур районида 2 милйондәк уйғур, қазақ вә башқа мусулман хәлқләрни йиғивелиш лагерлириға қамап, диний етиқадини омумйүзлүк чәкләш, мәсчитләрни кәң көләмлик чеқип ташлаштәк қилмишлирини ақлиған.

Абдурәқип абдунияз, бу һәқтики тәнқидләрни «дөлитимизниң иқтисадий йүксилишигә һәсәт отлирида қайнап ташқан бир түркүм ичи яман дөләтләрниң шинҗаң һәққидә тарқатқан бир патман ялған-явидақ гәплири» дәп тәриплигән. Хәвәрдә баян қилинишичә, моһди азни абдул һамид йәнә «хитай һөкүмитиниң һазирму мусулманларға қарита бастуруш сиясити йүргүзүватқанлиқи, нурғун мусулман уйғурлар хитайдин қечиш мәҗбурийитидә қелиштәк бу реаллиқни инкар қилалмиғанлиқи» ни илгири сүргән.

Униң қаришичә, әгәр хитай уйғурларға бесим қилмайватқанлиқини испатлимақчи болса, у мустәқил хәлқара көзәткүчиләрниң райондики тутуп туруш мәркәзлиридә тәкшүрүш елишип беришиға йол қоюши, зиянкәшликкә учриғучилар билән көрүшүшкә рухсәт қилиши керәк икән. У йәнә малайсия һөкүмити вә таратқулири һәм алақидар орунлириниң бу мәсилидә җиддий болуп, хитайниң сөзлирини қобул қилмаслиқи керәкликини билдүргән.

Малайсия һөкүмити илгири изчил уйғурлар мәсилисини муәййән дәриҗидә көңүл бөлүп хитайға тәнқиди пикирләрдә болуп кәлгән. Өткән һәптә хитай һөкүмити алайитән вәкилләр өмики тәшкилләп, малайсияға әвәткән. Вәкилләр өмики өзлириниң уйғурлар диярида «террорлуқ вә әсәбийликни йоқитишқа, намратлиқни чөрүп ташлаш» қа ярдәм бериватқанлиқини илгири сүргәниди.

Толуқ бәт