Malaysiyadiki yéngi hökümet Uyghur musapirlar mesilisige köngül bölüshke chaqirildi

Muxbirimiz irade
2018-07-03
Share

Malaysiyada yéqinda hökümet almiship, yéngi bash ministir mahatir muhemmed wezipige olturdi. Buning bilen malaysiyadiki bir qisim axbarat wasitiliri malaysiyada yéngidin teshkillen'gen hökümetni Uyghur musapirlar mesilisige köngül bölüshke chaqirdi.

3-Iyul küni “Bügünki erkin malaysiya” gézitide malaysiyada xitaygha qayturulush xewpi astida turuwatqan 11 neper Uyghur musapir tutqunning mesilisi asas qilinip, “Yéngi malaysiya musapirlar üchün bir ümidmu” mawzuluq bir parche maqale élan qilindi.

Maqalide Uyghurlarning xitay hökümitining türlük ziyankeshliklirige uchrawatqanliqi kishilik hoquq organlirining doklatliri arqiliq tonushturulghan we “Malaysiya hökümitining Uyghurlarning weziyitini özgertishke qurbi yetmisimu, emma héch bolmighanda malaysiyagha panahlinish üchün kelgen gunahsiz Uyghurlarni qanat astigha élish mejburiyiti bar,” dep eskertilgen.

Malaysiyada tutup turuluwatqan 11 neper Uyghur tutqun 4 yilning aldida taylandta tutulup qalghan Uyghur musapirlarning bir qismi idi. Ular ötken yilning axiri taylandtiki bir türmidin qéchip, malaysiya chégrasi ichige kirgendin kéyin malaysiya saqchiliri teripidin tutqun qilin'ghan. Ular nöwette malaysiya chégrasidin qanunsiz kirish jinayiti bilen eyiblinip sotqa chiqishni kütüp yatmaqta.

Maqalide “Yéngi malaysiya hökümitining malaysiyada yolgha qoyushi kérek bolghan nurghun ishliri bolsimu, emma ularning musapirlar mesilisini qandaq hel qilishi ularning aldigha qoyulidighan tunji sinaq bolidu,” déyilgen.

Maqale aptori yene sabiq malaysiya bash ministiri najib razaq mezgilide malaysiyagha qéchip kelgen siyasiy panahlan'ghuchilarning qilche ikkilenmestin öz dölitige qayturulghanliqini, bular ichide xitaydin qéchip kelgen bir türküm Uyghurlarning b d t musapirlar ishxanisi teripidin bérilgen musapirliq salahiyitige qarimay xitaygha qayturuwétilgenlikini bayan qilip, “Bu achchiq weqe menggü malaysiyaning yüzidiki bir dagh bolup qalidu,” dégen.

Mezkur maqalining aptori dénns ignatiyus ependi malaysiyaning sabiq elchisi bolup, u malaysiya tashqi ishlar ministirliki qarmiqida oxshimighan dölet we xelq'araliq organlarda elchilik wezipisini ötigen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet