Малайшия даирилириниң уйғур мәсилисидики мәйдани малайшиядики исламий гуруһларни биарам қилишқа башлиди

Мухбиримиз әркин
2018.07.11

Малайшия һөкүмитиниң уйғур мусапирлар мәсилисидики сиясити малайшиядики бәзи исламий гуруһларни биарам қилишқа башлиған.

Малайшия “ислами ойғиниш фронти” ниң қурғучиси вә директори әхмәт фаруқ муса 9‏-июл “бүгүнки әркин малайшия гезити” дә мақалә елан қилип, малайшия һөкүмитиниң уйғурларға пәрқлиқ, башқа мусулманларға пәрқлиқ муамилә қиливатқанлиқини тәнқид қилған.

У мақалисидә, малайшия уйғурларниң түрмигә ташлиниши, тән җазасиға учриши яки өлтүрүлүши ениқ болсиму, лекин униң немә үчүн хитайниң бесимиға тиз пүкидиғанлиқиға соал қойған. Малайшия һөкүмити илгири нурғун уйғур мусапирлирини тутқун қилип, уларни хитайға қайтуруп бәргән. Йеқинда тайланд түрмисидин қечип чиқип малайшияға өткән 11 нәпәр уйғурни тутқун қилип, сотлашқа башлиған. Уларни “чеградин қанунсиз кириш” билән әйиблигән иди.

Әхмәт фаруқ муса “уйғурларни қоғдашниң пәләстинләрни қоғдаштин қандақ пәрқи бар” сәрләвһилик мақалисидә: “биз вә һөкүмәт даим пәләстинликләр вә башқа мусулманларниң һоқуқида алдинқи сәпкә чиқивелип, чемпийон болушқа алдирисақму, лекин қандақларчә уйғурларниң чекиватқан изтирапи, дәрд-әлими, уларниң һазирқи әһвали, сотлиниши, тартиватқан җапа-мушәққити вә учраватқан тән җазалирини һес қилалмаймиз” дәп тәкитлигән.

У қаришичә, уйғурларни қоғдаш “малайшия өзини даим кишилик һоқуқ чемпийони, дәп сүрәтләп кәлгәндәк ноқул кишилик һоқуқ мәсилиси әмәс, бәлки йәнә бир диний мәҗбурийәт” икән.

У мақалисиниң ахирида, әгәр бу уйғурлар хитай компартийәсиниң сиясий зиянкәшликидин қачқан болса, бу хитайни рәнҗиткән тәқдирдиму, уларни һәрқандақ бәдәлгә қаримай қоғдаш керәкликини тәкитлигән. Малайшиядики бир сот мәһкимиси өткән һәптә юқириқи 11 нәпәр уйғур мусапириниң сотини 25‏-июлға кечиктүргән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.