Манас районида мол көмүр кан записи барлиқи бекитилди

Мухбиримиз үмидвар
2017-07-02
Share

Йеқинда, уйғур аптоном райони даирилири вә хитай дөләтлик енергийә идариси җәнубий җуңғар көмүрлүкиниң манас дәряси вадиси, йәни манас наһийә тәвәликидики көмүр кан районидики көмүр запас миқдарини тәкшүрүп бекиткән болуп, бу районда сүпити юқири үч милярд 818 милйон тонна көмүр записи барлиқи ашкариланған. "шинҗаң иқтисад гезити" ниң хәвиридин мәлум болушичә, уйғур аптоном райони даирилири мәзкур наһайити мол көмүр записиға асасән бу җайда чоң көләмдә кан райони вә көмүр електр базиси қуруш мумкин, дәп һесаблиған.

Һазир уйғур диярида җәнуби җуңғар вә шәрқий җуңғар көмүрлүклири, турпан-қумул, или, қоштолғай, кучар вә бай көмүрлүклири асаслиқ нуқта сүпитидә иш елип бармақта. Манас наһийиси тәвәсидики мәзкур көмүр записи биваситә җәнубий җуңғар көмүрлүки тәрипидин ечилидикән.

Хитай "дөләтлик көмүри санаити тори" вә башқиларниң хәвиридин мәлум болушичә, 2011-йили уйғур диярида йеңидин көпәйгән көмүр байлиқи записиниң 320 милярд тонниға йәткәнлики, 2014-болса 369 милярд 200 милйон тонна икәнлики һесаблап чиқилған болуп, һазир уйғур дияри хитайниң муһим көмүр базисиға айландурулған.

Хитай һөкүмити "шинҗаңниң көмүрини шәрққә тошуш" пиланини йиллардин буян давамлаштуруватқан болуп, һәр қайси көмүрлүкләрни ечиш қәдимини тезлитип, көмүр мәһсулатлирини ичкири хитай өлкилиригә тошуш миқдариниму ашурмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт