Maralbéshida éghir qatnash weqesi yüz bérip, az dégende 22 adem ölgen

Muxbirimiz erkin
2015.02.25


Uyghur ilining maralbéshi nahiyeside 24 - féwral éghir qatnash weqesi yüz bérip, az dégende 22 adem ölgen, 38 adem yarilan'ghan. 24 - Féwral shu yerning waqti kech sa'et 9:30 gha az qalghanda, aqsu - qeshqer téz sür'etlik tash yolining maralbéshi nahiyesidiki bölükide bir yoluchilar aptobusi aghdurulup ketken.

Aptobusning qaysi yölünüshke qarap kétiwatqanliqi, aptobusning aghdurulup kétishige néme seweb bolghanliqi we ölgenlerning milliti, kimliki qatarliq tepsilatlar melum emes. Xitay axbarati we yerlik metbu'atlarda, yerlik hökümetning yaridarlarni jiddiy qutquzuwatqanliqi, weqening sewebi tekshürülüwatqanliqidin bashqa, héchqandaq tepsiliy uchur bermigen.

Qatnash weqesi xitayning chaghan bayrimi axirliship, yoluchilar qatnishi yene jiddiyleshken mezgilde yüz berdi. Maralbéshida yüz bergen bu weqe Uyghur ilida yéqinqi 10 yildin béri yüz bergen éghir qatnash weqelirining biri. Kucharda 2008 - yili dékabirda yüz bergen bir qétimliq qatnash weqeside 20 adem ölgen. Shu yili 8 - ayda qizilsuda yüz bergen qatnash weqeside 24 kishi hayatidin ayrilghan idi.

Xitay dunyadiki qatnash weqesi yüz bérish nisbiti intayin yuqiri dölet. Xitayda 2011 - yili 62 ming adem qatnash weqeside ölgen. Xitaydiki qatnash weqelirini köp hallarda shopurlarning tejribisizliki, aptobus yaki aptomobilgha normidin artuq adem yaki yük qachilash qatarliq amillar keltürüp chiqiridiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.