Marko rubiyo: “Süküt qilish hergizmu tallash emes”

Muxbirimiz nur'iman
2021-11-11
Share

9-Noyabir küni amérikadiki “Yehudiy qirghinchiliqi xatire muzéyi” simon-skjod irqiy qirghinchiliqning aldini élish tetqiqat merkizi “Bizni asta-asta yoqatmaqchi: xitay hökümitining Uyghurlargha qaratqan hujumi” serlewhlik bir doklat ilan qildi. Mezkur doklatta xitay hökümitining Uyghurlargha qaritiwatqan “Insaniyetke qarshi jinayet” lirini yenimu kücheytkenlikige da'ir ishenchlik pakitlar körsitip ötüldi.

Doklat élan qiln'ghandin kéyin, xelq'ara jama'etning diqqiti qaytidin xitay hakimiyitining Uyghurlargha yürgüzüwatqan basturushlirigha yötkeldi. Amérika bashchiliqidiki démokratik döletlerning xitayning Uyghurlargha qaratqan zulumlirini “Irqiy qirghinchiliq” dep tonughanliqidek bu muhim qarar yene bir qétim xelq'ara taratqularning diqqet merkizige keldi.

Amérika tashqiy ishlar ministirliqi qarimiqidiki “Puqralar bixeterliki, démokratiye we kishilik hoquq” komitétining mudiri uzra zeya xanim özining ijtima'iy taratqu hisabida amérika hökümitinng mezkur doklatqa diqqet qiliwatqanliqini bildürgen. U mundaq dep yazghan: “Amérika hökümiti ‛yehudiy qirghinchiliqi muzéyi‚ teyyarlighan xitay xelq jumhuriyitining shinjangdiki Uyghurlargha qaratmiliq élip bériwatqan jinayetliri toghrisidiki yéngi doklatini qarshi alidu. Biz xitay hökümitining bu basturushlarni derhal toxtitip, naheq qolgha élin'ghanlarni derhal qoyup bérishni telep qilimiz.”

Mezkur doklat élan qilin'ghan küni irqiy qirghinchiliqning aldini élish tetqiqat merkizining ijtima'iy taratqu supisida amérika kingish palata ezasi marko rubiyo söz qilghan bir sin körünüshi tarqatqan. Marko rubiyo mezkur sin körünüshide mundaq dégen: “Del mushu waqitning özide xitay kompartiyesi shinjangdiki Uyghur we bashqa yerlik milletlerni yoqitish üchün sistémiliq heriket élip barmaqta. Mejburiy tughmas qilish, jaza lagérliri, mejburiy emgek we bashqa wehshiylikler shuning jümlisidindur. Süküt qilish hergizmu tallash emes.”

Yehudiy qirghinchiliqi muzéyining simon-skjod merkizi chet ellerdiki Uyghur guwahchilar, tetqiqatchilar, kishilik hoquq adwokatliri we xelq'ara jinayi ishlar qanuni mutexessislirini ziyaret qilish arqiliq bu 59 betlik doklatni teyyarlap chiqqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet