Maw zédongning insaniyet tarixidiki eng chong qatil ikenliki yene bir qétim tekitlenmekte

Muxbirimiz eziz
2019-10-01
Élxet
Pikir
Share
Print

Xitay kompartiyesi özlirining atalmish "70 Yilliq muweppeqiyetliri" ni hedep teshwiq qiliwatqanda xitay dölitining qurghuchisi maw zédong qozghighan "Chong sekrep ilgirilesh" mezgilide 45 milyon ademning acharchiliq sewebidin ölgenliki yene bir qétim tekitlendi. Herqaysi gézit-zhurnallarda bu heqte köplep maqaliler yézilip buni "Insaniyi'et tarixidiki eng zor qatilliq" dep tenqidlidi.

Xongkong uniwérsitétining proféssori frank dikottérning "Maw zédong qozghighan zor acharchiliq" namliq kitabida körsitilishiche, 1958-yilidin 1962-yilighiche dawam qilghan "Chong sekrep ilgirilesh" mezgilide 45 milyon xitay puqrasi achliqtin ölgen. Buningda maw zédongning iqtisadiy qanuniyettin qilche xewiri bolmighan ehwalda xitay iqtisadigha qomandanliq qilishtek ejellik xataliqi tüp seweb iken. Shundaq bolghachqa maw zédong "Polat-tömür tawlashta chong sekrep en'gliyedin éship kétish" sho'arini otturigha qoyup, pütün xitay boyiche polat-tömür tawlashni yolgha qoyghan. Buning bilen déhqanchiliq pütünley tashlinip qalghan. Aptorning bayan qilishiche, maw zédongning "Sowét ittipaqining barliq qerzlirini yémeklik arqiliq biraqla töliwétish we üchinchi dunya ellirige heqsiz yémeklik yardem bérish" buyruqi buningdiki yene bir zor xataliq iken. Ene shu yosunda pütün xitayda ashliq öksüp qalghan hemde acharchiliq hemme jayni qaplighan.

Jorj méyson uniwérsitétining qanun penliri proféssori ilya somin "Washin'gton pochtisi" da élan qilghan bu heqtiki maqaliside "Insaniyet tarixidiki eng chong qatil kim, dep soralsa kishiler adolf gitlérni tilgha élishi mumkin. Yene beziler joséf stalin, dep jawab bérishi mumkin. Emma maw zédong tinchliq zamanisida ach qoyup öltürgen insanlar bu ikkisi urush mezgilide qirip tashlighan ademlerning jem'iy sanidinmu köp" deydu.

Toluq bet