Майк помпейо варшавада уйғур мәсилисини тилға алди

Мухбиримиз әркин
2019.02.18

Америка ташқи ишлар министири майк помпейо полша пайтәхти варшавада америкиниң мәйли уйғур мәсилисидә болсун яки башқа дөләтләр мәсилисидә болсун кишилик һоқуққа хилаплиқ қилинса униңға көңүл бөлидиғанлиқини билдүргән.

Майк помпейо бу сөзләрни 13‏-феврал варшавада америка телевизийә қанили болған PBS ниң мухбириниң зияритини қобул қилғанда тәкитлигән. Майк помпейо өткән һәптиниң ахири варшавада өткүзүлгән оттура шәрқ тинчлиқ йиғиниға қатнашқан. У бу җәрянда PBS ниң мәхсус зияритини қобул қилип, оттура шәрқ вәзийити вә шималий корейәгә алақидар бир қатар соалларға җаваб бәргән иди.

Помпейо уйғур мәсилисини PBS мухбириниң “америка мисир, сүрийә, сәуди әрәбистан вә әрәб бирләшмә хәлипиликигә ирандики кишилик һоқуқ дәпсәндичиликлиригә көңүл бөлгәндәк көңүл бөлмәйду дегән қараш бар, буни қандақ тәңшәйсиз” дегән соалиға җаваб бәргәндә мәхсус тилға алған.

У “биз шуни наһайити ениқ көрситип кәлдуқ, кишилик һоқуқниң әң негизлик өлчимигә, инсан тәбиитидики униң иззәт-һөрмитигә һөрмәт қилмаслиқ әһвали қәйәрдә көрүлсә көрүлсун, америка буни байқисила оттуриға қойиду. Мәйли биз буни уйғур мусулманлири тутуп туруш лагерлириға қамалған хитайда байқайли яки иранда байқайли вә яки шимали корейәдәк башқа һәрқандақ бир дөләттә байқиған болайли,” дегән.

Майк помпейо уйғур мәсилисини муавин президент майк пәнсдин қалсила изчил тилға елип келиватқан әң юқири дәриҗилик америка әмәлдари. У өткән йили 9‏-айда хитайниң “йүз миңлиған бәлки милйонлиған уйғурларни өзлириниң ирадисигә хилап һалда аталмиш қайта тәрбийәләш лагерлириға қамап, уларға қарита меңә ююш елип бериватқанлиқи вә қорқунчлуқ дәриҗидә хораватқанлиқи” ни тәкитлигән. Лекин кишилик һоқуқ тәшкилатлириниң илгири сүрүшичә, майк помпийо уйғур мәсилисидә хитайни ашкара тәнқид қилип кәлгән болсиму, лекин у һазирға қәдәр униңға қарита бирәр конкрет җазалаш тәдбири елип бақмиған.

Өткән йили америка дөләт мәҗлисиниң бәзи авам палата әзалири билән кеңәш палата әзалири униңға хәт йезип, чен чүәнго қатарлиқ әмәлдарларни җазалашни тәләп қилған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.