Xitay qeshqerni dunya medeniy miraslar tizimlikige kirgüzüshke iltimas qilmighan

Bu yil 1‏-ayda, xitay, qirghizistan, özbékistan qatarliq ottura asiyadiki döletler yipek yolini b d t medeniyet, ma'arip, ilim-pen teshkilatining 2014‏-yilliq dunya medeniy miraslar tizimlikige kirgüzüshke resmiy iltimas qilghan.

Xitay terep xénen, shenshi, gensu, ningshyadiki yipek yoli yadikarliqlirini, yipek yolining Uyghur élige tewe qismidiki niye xarabisi, bézeklik ming öyi, qizil ming öy, sim-sim ming öyi, tuyuq ming öyi we qumtura ming öyi qatarliq jaylarni tizimlikke kirgüzüshke iltimas qilghan.

Qirghizistanning iltimasigha tengri taghliridiki balballar we qaraxaniylar paytexti balasaghun qedimiy shehiri kirgüzülgen. Lékin xitay terep qeshqer shehirini iltimas qilmighan.

Közetküchilerning ilgiri sürüshiche, xitay hökümitining qeshqerni chéqip, köchmen yötkesh pilani bolghachqa, mezkur sheherni qesten iltimas qilmighan.

Yawropa ittipaqi ikki yil awwal qeshqer shehirini qoghdash heqqide qarar maqullap, mezkur sheherni chéqishni toxtitish, uni yipek yolidiki qoghdilidighan dunya medeniy mirasilar tizimlikige kirgüzüshke iltimas qilishni telep qilghan idi.

B d t ma'arip, medeniyet , ilim-pen orgini bu yil tengritéghining köndileng, tömür choqqisi, boghda we bayinbulaq qatarliq jaylirini dunya tebi'iy miraslar tizimlikige kirgüzgen.