Xitay hökümiti “Junggo shinjang medeniyet heptiliki”teshwiqat pa'aliyitini bashlighan

Xitay medeniyet ministirliqi bilen Uyghur aptonom rayonluq xelq hökümitining birlikte uyushturushi bilen yawropa döletliride “Junggo shinjang medeniyet heptiliki”namidiki teshwiqat pa'aliyiti bashlan'ghan.

Tengritagh xewerler torining xewiridin qarighanda, bu medeniyet heptiliki “Bextiyar shinjang” edebiyat-sen'et kéchiliki, “Güzel shinjang” foto süret körgezmisi, “Jelpkar shinjang” mexsus témiliq filim körgezmisi, “Shinjang tesirati” namliq höjjetlik filim körgezmisi, “Sirliq shinjang toghrisida izdinish” medeniyet yadikarliqliri söhbiti qatarliq besh bölektin terkib tapidiken.

Tengritagh tori bu heqtiki xewiride mundaq dégen:
2015-Yilliq “Junggo shinjang medeniyet heptiliki” pa'aliyiti junggoning sirtqa qaritilghan medeniyet almashturushidiki muhim pa'aliyetlirining biri, “Bir belwagh, bir yol” istratégiyesining konkrét herikiti, shundaqla aptonom rayonimiz qurulghanliqining 60 yilliqini tebriklesh pa'aliyitining junggo-chet'el medeniyet merkizidiki yenimu kéngeytilishi we namayan qilinishi hésablinidu.

Igilinishiche, medeniyet heptiliki pa'aliyiti boyiche Uyghur élidin kelgen sen'etchiler aldinqi küni parizh shehiride oyun qoyghan.

Xitay hökümiti yéqindin buyan xitayning ichi we sirtigha qaratqan teshwiqatini kücheytip, 60 yildin buyan Uyghur élining zor tereqqiyatlarni qolgha keltürüp, her millet xelqining bextke érishkenlikini ilgiri sürdi. Biraq dunya Uyghur qurultiyi buni ret qilip, 60 yildin buyan Uyghurlarning siyasiy, iqtisadiy, dini, milliy hoquqlirining qattiq depsende qilin'ghanliqini bildürmekte.