Даириләр уйғур районида “мәдәнийәт ислаһати” елип беришни орунлаштурди

Мухбиримиз әркин
2017.08.18

Уйғур аптоном районлуқ партком 17‏-авғуст үрүмчидә йиғин чақирип, уйғур районида “мәдәнийәт ислаһати” елип беришни орунлаштурған. “тәңритағ тори” ниң хәвәр қилишичә, йиғинда даириләр аптоном районниң ахбарат, нәшрият, әдәбият-сәнәт саһәсиниң конкрет ислаһат лайиһилирини түзүп чиқип дәрһал йолға қоюшни тәләп қилған.

Йиғинда уйғур аптоном районлуқ партком тәшвиқат бөлүминиң башлиқи, мәдәнийәт ислаһат рәһбәрлик гурупписиниң мәсули тйән вен, бейҗиң һөкүмити вә аптоном районлуқ парткомниң бу һәқтики орунлаштурушини тонуштурған.

“тәңритағ тори” ниң ашкарилишичә, даириләрниң мәдәнийәт ислаһати елип бериш тоғрисидики орунлаштурушида, ислаһатниң ахбарат саһәсини өз-ара юғурушини, нәшрият саһәлирини өз-ара бирләштүрүшни, әдәбият-сәнәтниң “дәвр еқимиға вә тарихий вәзиписигә капаләтлик қилиши” ни, униң муштирилар топини кеңәйтип, әдәбият-сәнәт бирләшмисини иллиқ, инақ әдәбият-сәнәтчиләр аилисигә айландурушини алға сүрүши керәклики тәкитләнгән.

Хитайниң уйғур районида мәдәнийәт ислаһати елип бериш пилани униң мәзкур районда идеологийә сепидики “икки йүзлимичиләр” гә зәрбә бериш дегәнни баһанә қилип, нәшрият, маарип, әдәбият-сәнәт саһәсидики бир қисим уйғур маарипчиларни, язғучи-шаирларни, музикант-сәнәтчиләрни тазилаватқан мәзгилдә оттуриға қоюлди. “тәңритағ тори” ниң хәвиридә йәнә, мәдәнийәт, киночилиқ, нәшрият, ахбарат қатарлиқ охшимиған саһәләрдә елип берилидиған ислаһатниң айрим-айрим лайиһилинидиғанлиқи, “бир органға бир сиясәт” тәлипи бойичә конкрет ислаһат сиясити вә лайиһиси түзүп чиқилидиғанлиқи билдүрүлгән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.