Uyghur élidiki mejburiy emgek mesilisi amérika dölet mejlisining diqqitini qozghidi

Muxbirimiz irade
2020-03-05
Élxet
Pikir
Share
Print

Amérika dölet mejlisi qarmiqidiki xitay ishliri komitéti 11-mart küni "Xelq'araliq teminlesh zenjiri, mejburiy emgek we shinjang Uyghur aptonom rayoni" söhbet yighini uyushturidighanliqini jakarlidi.

Xitay ishliri komitéti mezkur yighin heqqidiki bayanatida, xitay hökümitining Uyghur élide mejburiy emgek sistémisi berpa qilip, Uyghur élidiki lagér tutqunlirini xelq'araliq tawar markilarni mal bilen teminleydighan yémek-ichmek we toqumichiliq zawutlirida mejburiy emgekke séliwatqanliqi, bu mallarning netijide amérika we yawropa bazarlirigha kirip bu döletler we shirketler üchün mejburiy emgekke yantayaq bolushtek xewpke yol échiwatqanliqi eskertilgen.

Yéqinda, awstraliye istratégiyelik siyaset instituti tekshürüsh doklati élan qilip, 2017-2019-yilliri arisida xitay da'irilirining Uyghur élidin 80 mingdin artuq kishini xitay ölkiliridiki zawutlarda ishleshke yötkigenliki we ularning xelq'aradiki 80 din artuq dangliq markilarni mal bilen teminleydighan zawutlarda "Zamaniwi qulluq" qa séliniwatqanliqini ashkarilap zor ghulghula qozghighanidi.

Amérika dölet mejlisi qarmiqidiki xitay ishliri komitéti yighin heqqidiki uqturushida amérika we yawropa shirketlirining derhal xitay bilen bolghan hemkarliqini közdin kechürüp, bu ehwalgha xatime bérish üchün keskin tedbirler élishi kéreklikini eskertken.

Melum bolushiche, 11-mart künidiki yighinda mushu heqte mexsus doklat élan qilinish bilen birge, amérikadiki her ikki partiyedin bolghan qanun tüzgüchiler bir arigha kélip, Uyghur rayonidiki mejburiy emgek asasida ishlep chiqirilghan mallarning amérika bazirigha kirishini chekleydighan tedbirler heqqide muzakire ep baridiken.

Toluq bet