Боб мәнәндиз уйғур районидики мәҗбурий әмгәкни тохтитишқа чақириқ қилди

Мухбиримиз нуриман
2020-03-11
Елхәт
Пикир
Share
Принт

Америка кеңәш палата әзаси сенатор боб мәнәндиз америка сода министирлиқини уйғур районидики мәҗбурий әмгәкни тохтитиш үчүн һәрикәт қоллинишқа чақирди.

Ройтирис агентлиқиниң хәвиригә асасланғанда, америка кеңәш палата әзаси сенатор боб мәнәндиз сода министири вилбир росқа язған хетидә «алма», «кирафит хәйниз», «кока-кола» вә «гәп» қатарлиқ америка ширкәтлириниң мәһсулатлирини уйғур районида ишләпчиқиришниң давам қиливатқанлиқини ейтип: «ширкәтләрниң мәсулийәтсизлики уйғур районидики уйғур, қазақ, қирғиз вә башқа мусулман аммисиниң зулумға учришидин ибарәт бу қилмишқа шерик болғанлиқтур,» дәп тәкитлиди.

Мәнәндиз америка ширкәтлириниң уйғур районидики «қорқунчлуқ» мәҗбурий әмгәккә селиш вәзийитини қәстән билмәсликкә селивелишини әйиблиди. У йәнә сода министирлиқиниң америка ширкәтлириниң вә муштәрилириниң «мәҗбурий әмгәк» арқилиқ ишләпчиқирилған мәһсулатларни сетивелишни тохтитиши керәкликини билдүрди.

Боб мәнәндиз америка демократчилар партийәсидин болуп, уйғур мәсилисигә йеқиндин көңүл бөлүп келиватқан, «уйғур кишилик һоқуқ қанун лайиһәси» ниң тонуштурулушидиму муһим рол ойниған сенаторларниң биридур. Боб мәнәндиз тунҗи қетим лагерларни «йеғивелиш лагери» дәп атиған иди.

Австралийә истратегийәлик сиясәт институтиниң ашкарилишичә, 2017-2019-йиллири арисида хитай даирилири уйғур елидин 80 миңдин артуқ кишини хитай өлкилиридики завутларда ишләшкә йөткәп кәткән вә буларниң бир қисми биваситә лагерлардин елип кетилгән. Мәзкур тәтқиқат оргини дуня миқяси бойичә биваситә яки васитилик һалда уйғурларни мәҗбурий әмгәккә селиш мәсилисигә четилип қалған җәмий 83 хәлқаралиқ маркини ениқлап чиққан.

Пикирләр (0)
Share
Толуқ бәт