Bob menendiz Uyghur rayonidiki mejburiy emgekni toxtitishqa chaqiriq qildi

Muxbirimiz nur'iman
2020-03-11
Élxet
Pikir
Share
Print

Amérika kéngesh palata ezasi sénator bob menendiz amérika soda ministirliqini Uyghur rayonidiki mejburiy emgekni toxtitish üchün heriket qollinishqa chaqirdi.

Roytiris agéntliqining xewirige asaslan'ghanda, amérika kéngesh palata ezasi sénator bob menendiz soda ministiri wilbir rosqa yazghan xétide "Alma", "Kirafit xeyniz", "Koka-kola" we "Gep" qatarliq amérika shirketlirining mehsulatlirini Uyghur rayonida ishlepchiqirishning dawam qiliwatqanliqini éytip: "Shirketlerning mes'uliyetsizliki Uyghur rayonidiki Uyghur, qazaq, qirghiz we bashqa musulman ammisining zulumgha uchrishidin ibaret bu qilmishqa shérik bolghanliqtur," dep tekitlidi.

Menendiz amérika shirketlirining Uyghur rayonidiki "Qorqunchluq" mejburiy emgekke sélish weziyitini qesten bilmeslikke séliwélishini eyiblidi. U yene soda ministirliqining amérika shirketlirining we mushterilirining "Mejburiy emgek" arqiliq ishlepchiqirilghan mehsulatlarni sétiwélishni toxtitishi kéreklikini bildürdi.

Bob menendiz amérika démokratchilar partiyesidin bolup, Uyghur mesilisige yéqindin köngül bölüp kéliwatqan, "Uyghur kishilik hoquq qanun layihesi" ning tonushturulushidimu muhim rol oynighan sénatorlarning biridur. Bob menendiz tunji qétim lagérlarni "Yéghiwélish lagéri" dep atighan idi.

Awstraliye istratégiyelik siyaset institutining ashkarilishiche, 2017-2019-yilliri arisida xitay da'iriliri Uyghur élidin 80 mingdin artuq kishini xitay ölkiliridiki zawutlarda ishleshke yötkep ketken we bularning bir qismi biwasite lagérlardin élip kétilgen. Mezkur tetqiqat orgini dunya miqyasi boyiche biwasite yaki wasitilik halda Uyghurlarni mejburiy emgekke sélish mesilisige chétilip qalghan jem'iy 83 xelq'araliq markini éniqlap chiqqan.

Toluq bet