Uyghur rayonidiki mejburiy emgekning kölimi zadi qanchilik?

Muxbirimiz jewlan
2021-01-06
Share

Ötken yil tetqiqatchi adriyan zénizning Uyghur rayonidiki mejburiy emgek toghruluq bergen doklatida, "Mejburiy emgekke qatnashqanlarning sani az dégende 570 mingdin ashidu" déyilgen bolup, pütkül Uyghur rayondiki omumiy sanning buningdin nechche hesse yuqiriliqi perez qilin'ghanidi.

5-Yanwar amérikaning dangliq taratquliridin biri bolghan "Aksiyos" (Axios) torida "Uyghur rayonidiki mejburiy emgekning kölimi biz bilgendinmu keng" namliq maqale élan qilin'ghan bolup, uningda körsitilishche, xitay da'irliri yéqinqi ikki yilda Uyghur rayonida lagérlarning qorshaw témi ichide chong tiptiki zawutlarni qurghan hemde 3 yildin buyan yüz minglighan Uyghurni paxtizarliqlarda ishleshke mejburlighan. Buningdiki eng chong seweb, Uyghur rayonida ishlepchiqirilghan mehsulatlar dunyaning her qaysi jayliridiki mal teminlesh halqisining eng payda tapidighan türlirige aylan'ghan.

Maqalide mundaq déyilgen: "Tetqiqatchilarning tekshürüsh doklatidin melumki, xitay hökümiti Uyghur déhqanlirini 'namratliqtin qutuldurush' sho'ari astida ish meydanlirigha top-top ewetken. Emgekchilerni xalighan yerge yötkesh xitay hökümitining Uyghurlarni kontrol qilish we ularni assimilatsiye qilishtiki muhim wasitisi bolup qalghan".

"Bazfid" (Buzzfeed) tori élan qilghan eng yéngi doklatta bildürülüshiche, Uyghur rayonida 100 din artuq chong tiptiki lagérlar bolup, ichidiki zawutlarning kölimi 21 milyon kuwadrat métirdin ashidiken. Bu zawutlarning yénigha 1500 din artuq shirket jaylashqan bolup, buning ichide nechche onlighan shirket chet ellerge mal éksport qilidiken.

Yuqiriqi maqalining axirida mundaq déyilgen: "Yéngi tekshürüshlerdin melum boldiki, xitay hökümiti Uyghur rayonidiki mejburiy emgekning kölimini téximu kéngeytmekte. Emma taki bügün'giche, dunyaning her qaysi jayliridiki hökümetler we shirketler iqtisadiy menpe'etni birinchi oyun'gha qoyup kelmekte."

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet