Хитай олимпик тәнһәрикәтчиләрниң кийимлири уйғур мәҗбурий әмгикигә четишлиқ икән

Мухбиримиз ирадә
2022-01-07
Share

Қишлиқ олимпик мусабиқисигә қатнишидиған хитай тәнһәрикәтчилириниң тәнһәрикәт кийимлириниң уйғурларниң мәҗбурий әмгикигә биваситә четишлиқ икәнлики ашкариланди.

“җәнубий хитай сәһәр почтиси” гезитиниң хәвәр қилишичә, уйғур елида ишләпчиқирилған 2000 йүрүштин артуқ тәнһәрикәт кийими қишлиқ олимпик тәнһәрикәт мусабиқисигә қатнишидиған хитай командисиға йәткүзүлгән.

Уйғур елиниң пахтиси вә төгә юңлири билән тикилгән бир йүрүш қишлиқ кийим-кечәкләрни алтайниң қаба наһийәсигә җайлашқан “яҗу тоқумичилиқ ширкити” ишләпчиқарған болуп, улар тәнһәрикәтчиләрниң қар тейилиш кийими, пәләй, баш кийими вә қулақча қатарлиқларни өз ичигә алидикән.

Хәлқара олимпик комитетиниң уйғурларға қаритиливатқан ирқий қирғинчилиқ вә мәҗбурий әмгәккә қаримай хитайдики қишлиқ олимпик мусабиқисини бикар қилишни рәт қилиши күчлүк муназирә қозғаватқан бир пәйттә олимпик тәнһәрикәтчилириниң кийимлириниңму уйғур мәҗбурий әмгикигә биваситә мунасивәтлик ширкәтләргә заказ қилинғанлиқи ашкарилинип күчлүк наразилиқ қозғиғаниди. Хитай тәнһәрикәтчиләрниң кийимлири буниң типик мисали икән.

Мәлум болушичә тәнһәрикәт кийимлири бейҗиңға йетип кәлгәндә дөләт тәнтәрбийә баш идариси қишлиқ тәнтәрбийә башқуруш мәркизиниң муавин мудири җаң шисәй мәхсус сөз қилип, бу тәнһәрикәт кийимлири районниң “мәһсулат пишшиқлап ишләш техникиси” ниң етирап қилиниши дәп тәриплигән.

Уйғур районлуқ тәнтәрбийә идарисиниң муавин мудири җаң болса: “қишлиқ олимпик тәнһәрикәт мусабиқисигә қатнишидиған тәнһәрикәтчилиримизниң қишлиқ кийим-кечикиниң шинҗаң пахтиси вә төгә юңи билән ишләпчиқирилиши биздики хам әшяниң сүпитини әкс әттүрүп бериду” дегән.

У йәнә бу тәнһәрикәт кийимлири “шинҗаңниң 2022-йиллиқ қишлиқ олимпик тәнһәрикәт мусабиқисигә қошқан төһписи” дегән.

Чәтәлләрдики көзәткүчиләр хитай һөкүмитиниң бейҗиң қишлиқ олимпик мусабиқисини уйғурларға қаритиватқан ирқий қирғинчилиқ вә мәҗбурий әмгәк сияситини ақлаш тәшвиқати үчүн қоллинишни башливәткәнликини билдүрүшмәктә.

Америка һөкүмити хитайниң уйғурларға қаритиватқан ирқий қирғинчилиқини нәзәрдә тутуп туруп, 2022-йиллиқ бейҗиң қишлиқ олимпик мусабиқисини дипломатик байқут қилидиғанлиқини җакарлиғаниди.

Буниң билән әнглийә, канада вә австиралийәму хитайниң еғир кишилик һоқуқ хатириси сәвәблик дипломатик байқутқа қатнашқан.

7-январ күни болса, шималий корейә хитайға рәсмий мәктуп йоллап шималий корейәниң бәзи “дүшмән күчләр” сәвәбидин вә “ковид-19” вируси сәвәбидин бу нөвәтлик олимпик мусабиқисигә қатнишалмайдиғанлиқини уқтурған. Әмма униң дипломатлирини әвәтмәйдиғанлиқи яки тәнһәрикәтчилирини әвәтмәйдиғанлиқи ениқ әмәс икән.

Японийә вә германийә қатарлиқ дөләтләрму хитай олимпикини байқут қилмиған болсиму әмма әмәлдарлирини әвәтмәйдиғанлиқини җакарлиғаниди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт