Оливия енос: “‛уйғур мәҗбурий әмгикини чәкләш қануни‚ни әмәлийләштүрүшниң вақти кәлди!”

Мухбиримиз әзиз
2022-01-12
Share

Америка дөләт мәҗлиси бирдәк мақуллап америка президенти җов байденниң имза қоюши билән рәсмий қанунға айланған “уйғур мәҗбурий әмгикини чәкләш қануни” да уйғур дияридики мәҗбурий әмгәккә бағлинишлиқ һәрқандақ таварниң америка базириға кириши мәни қилинғаниди. Шуниңдин кейинки алтә ай вақит мәзкур қанунниң иҗра болуш басқучиға өтүшидә бәкму һалқилиқ рол ойнайдиған болуп, бу һәқтики әһваллар “мирас” фондиниң тәтқиқатчиси оливия еносниң бу һәқтики обзор мақалисидә тәпсилий шәрһиләнди.

11-январ күни “форбес” журнилиға бесилған бу мақалида оливия енос мәзкур қанун лайиһәсиниң мақулланғанлиқи бир зор ғәлибә һесаблансиму буниң иҗра болуш мусаписидики қилидиған ишларниң көплүкини алаһидә тәкитләйду. Шуниңдәк бу җәһәттә нуқтилиқ қилип мәзкур қанун лайиһәси мақулланғандин кейинки бирнәччә сүрүк муддитиниң муһимлиқини рәткә тизип чиқиду.

Апторниң қаришичә, мәзкур қанун лайиһисидики маддиларға асасән “америка-мекисика-канада чегра келишими” гә қошумчә бәрпа қилинған “мәҗбурий әмгәк иҗраийәт күчлири” намидики қанун иҗра қилиш қошуни 30 күн ичидә “федератсийә тизими” ға бу қанун тоғрисида амминиң пикирини елиш һәққидики тәләпни йоллиши лазим икән. Америка һөкүмитиниң рәсмий күндилик хизмәт хатириси болған “федератсийә тизими” му мушу тәләп бойичә амма бу һәқтики пикирлирини баян қилалайдиған бир сәһипә аҗритидикән.

Иккинчидин, аммиви пикир сәһиписи һәққидики тәләп тапшурулуп 45 күн ичидә қанун иҗра қилиш қошуни америка һөкүмитиниң хитайдики мәҗбурий әмгәк мәһсулатлириға қарита қандақ позитсийәдә икәнлики тоғрисида бир қетимлиқ гуваһлиқ йиғини ечиши лазим икән. Бу гуваһлиқта мәҗбурий әмгәк мәһсулатлирини қандақ назарәт қилиш һәққидики әң яхши тәдбирләр музакирә қилинидикән.

Үчинчидин, мәзкур қанундики маддилар бойичә, қанун иҗра қилиш қошуни җәзмән мәҗбурий әмгәк билән ишләнгән һәрқандақ таварниң америка базириға киришини тосушқа кепиллик қилиши лазим икән. Буниңда ашу хил таварларни ишлигән шәхсләр яки ширкәтләргә җаза беришму муһим орун игиләйдикән.

Аптор мушу әһвалларни омумлаштуруп, мәҗбурий әмгәк билән ишләнгән таварларниң даирисини пүтүн хитай миқясида чәкләш, дәлил-испатлар арқилиқ чегра мудапиә вә таможна идарисини ‍учур билән тәминләш, шундақла бу идариниң хизмәт үнүмини ашуруш үчүн уларниң малийә хамчотини ашуруп бериш қатарлиқларниму диққәттин сақит қилмаслиқни алаһидә тәкитләйду.

Мәлум болушичә, “уйғур мәҗбурий әмгикини чәкләш қануни” ниң мақуллиниши биринчи қәдәмниң оңушлуқ тамамланғанлиқи болуп, униң кейинки иҗра болуш басқучида юқирида баян қилинғандәк көплигән қәдәмләр орунлиниши лазим икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт