Oliwiya énos: “‛Uyghur mejburiy emgikini cheklesh qanuni‚ni emeliyleshtürüshning waqti keldi!”

Muxbirimiz eziz
2022-01-12
Share

Amérika dölet mejlisi birdek maqullap amérika prézidénti jow baydénning imza qoyushi bilen resmiy qanun'gha aylan'ghan “Uyghur mejburiy emgikini cheklesh qanuni” da Uyghur diyaridiki mejburiy emgekke baghlinishliq herqandaq tawarning amérika bazirigha kirishi men'i qilin'ghanidi. Shuningdin kéyinki alte ay waqit mezkur qanunning ijra bolush basquchigha ötüshide bekmu halqiliq rol oynaydighan bolup, bu heqtiki ehwallar “Miras” fondining tetqiqatchisi oliwiya énosning bu heqtiki obzor maqaliside tepsiliy sherhilendi.

11-Yanwar küni “Forbés” zhurniligha bésilghan bu maqalida oliwiya énos mezkur qanun layihesining maqullan'ghanliqi bir zor ghelibe hésablansimu buning ijra bolush musapisidiki qilidighan ishlarning köplükini alahide tekitleydu. Shuningdek bu jehette nuqtiliq qilip mezkur qanun layihesi maqullan'ghandin kéyinki birnechche sürük mudditining muhimliqini retke tizip chiqidu.

Aptorning qarishiche, mezkur qanun layihisidiki maddilargha asasen “Amérika-mékisika-kanada chégra kélishimi” ge qoshumche berpa qilin'ghan “Mejburiy emgek ijra'iyet küchliri” namidiki qanun ijra qilish qoshuni 30 kün ichide “Fédératsiye tizimi” gha bu qanun toghrisida ammining pikirini élish heqqidiki telepni yollishi lazim iken. Amérika hökümitining resmiy kündilik xizmet xatirisi bolghan “Fédératsiye tizimi” mu mushu telep boyiche amma bu heqtiki pikirlirini bayan qilalaydighan bir sehipe ajritidiken.

Ikkinchidin, ammiwi pikir sehipisi heqqidiki telep tapshurulup 45 kün ichide qanun ijra qilish qoshuni amérika hökümitining xitaydiki mejburiy emgek mehsulatlirigha qarita qandaq pozitsiyede ikenliki toghrisida bir qétimliq guwahliq yighini échishi lazim iken. Bu guwahliqta mejburiy emgek mehsulatlirini qandaq nazaret qilish heqqidiki eng yaxshi tedbirler muzakire qilinidiken.

Üchinchidin, mezkur qanundiki maddilar boyiche, qanun ijra qilish qoshuni jezmen mejburiy emgek bilen ishlen'gen herqandaq tawarning amérika bazirigha kirishini tosushqa képillik qilishi lazim iken. Buningda ashu xil tawarlarni ishligen shexsler yaki shirketlerge jaza bérishmu muhim orun igileydiken.

Aptor mushu ehwallarni omumlashturup, mejburiy emgek bilen ishlen'gen tawarlarning da'irisini pütün xitay miqyasida cheklesh, delil-ispatlar arqiliq chégra mudapi'e we tamozhna idarisini ‍uchur bilen teminlesh, shundaqla bu idarining xizmet ünümini ashurush üchün ularning maliye xamchotini ashurup bérish qatarliqlarnimu diqqettin saqit qilmasliqni alahide tekitleydu.

Melum bolushiche, “Uyghur mejburiy emgikini cheklesh qanuni” ning maqullinishi birinchi qedemning ongushluq tamamlan'ghanliqi bolup, uning kéyinki ijra bolush basquchida yuqirida bayan qilin'ghandek köpligen qedemler orunlinishi lazim iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet