Mejburiy emgek mehsulatlirining amérika baziridin shallinishigha xitay inkas qayturdi

Amérika bazirida sétiliwatqan bir qisim tawarlarning Uyghur diyaridiki mejburiy emgekke chétishliq ikenliki melum bolghandin kéyin herqaysi parche sétish orunlirining bu tawarlarni öz dukanliridin shallishi körülgenidi. Xitay hökümiti 13-yanwar küni béyjingda axbarat élan qilish yighini chaqirip herqaysi soda shirketlirini “Amérikidiki siyasiyonlar bilen birlikte bulghanmasliq” qa dewet qildi.

Xewerde éytilishiche, xitay hökümiti yéqinda Walmart shirkitining, bolupmu uning tarmaq shirkiti bolghan Sam's Club shirkitining bir qisim tawarlarni Uyghur diyaridiki mejburiy emgekning mehsuli, dep qarap öz dukanliridin chiqiriwetkenlikini “Uchigha chiqqan exlaqsizliq” dep eyibligen. Uyghur aptonom rayonluq hökümetning bayanatchisi shü guyshyang muxbirlarni kütüwélish yighinida söz qilip “Intil shirkitimu atalmish mejburiy emgek heqqide jar salghan. Emma aridin uzun ötmey istimalchilirimizgha bash egdi. ‛tésla‚, ‛kerrifor‚ qatarliqlarmu dölitimizde zor alqishqa érishiwatidu” dégen.

Halbuki shü guyshyang alahide maxtighan bu shirketlerning xitaygha xushamet qilishi gherb dunyasida qattiq eyibleshlerge we tenqidlerge uchrighan bolup, ularning eqelliy soda exlaqini yoqatqanliqi milyonlarche kishining nepritini qozghighan. Amérika kéngesh palata ezasi marko rubyo ilgiri-kéyin bolup “Intil” we “Tésla” shirketlirining qilmishlirini pash qilip ochuq bayanat élan qilghan hemde ularning insaniy wijdanini tarazigha sélip körüshke chaqirghanidi.