Америкалиқ сода мутәхәссилири америка ширкәтлирини уйғур мәҗбурий әмгикидин һәзәр әйләшкә чақирған

Мухбиримиз ирадә
2022-01-20
Share

Америкадики алдинқи қатарда туридиған сода мутәхәссислириниң күндилик хәвәр анализлири вә тәһлиллири елан қилинидиған кәспий тор бәтләрдин “JD Supra” намлиқ тор бәттә елан қилинған бир мақалидә, америка ширкәтлири “уйғур мәҗбурий әмгикиниң алдини елиш қануни” бойичә иш көрүп, уйғур мәҗбурий әмгикигә четилип қалмаслиққа чақирилған.

“‛уйғур мәҗбурий әмгикиниң алдини елиш қануни‚ америка карханилириға тәминләш зәнҗиридики кишилик һоқуқ мәсилисини бир тәрәп қилиш һәққидә бесим чүшүриду” дәп мавзу қоюлған бу анализ мақалисидә көрситилишичә, 2021-йили 12-айниң 23-күни, америка президенти җов байденниң имза қоюши билән рәсмий қанунға айланған бу қанун уйғур елида ишләпчиқирилған таварларниң америкаға импорт қилинишини үнүмлүк чәкләйдикән һәмдә уйғур ели билән алақиси бар ширкәтләрни җазалиниш хәвпи билән йүзләштүридикән.

Болупму тәминләш зәнҗирлири сәвәбидин уйғур ели билән мунасивити бар болған америка ширкәтлири, җүмлидин қуяш енергийәси вә тоқумичилиқ санаити қатарлиқ мәҗбурий әмгәк еһтималлиқи йүксәк саһәләрдә тиҗарәт қилидиған америка ширкәтлири бу қанунниң чәклимисигә бивастә учрайдикән.

Шуңа бу анализ мақалисидә американиң қуяш ениргийә вә тоқумичилиқ саһәсидики ширкәтлиригә “уйғур мәҗбурий әмгикиниң алдини елиш қануни” ниң йолға қоюлушини әстайидил көзитиш, шуниң билән бир вақитта дәрһал тәминләш зәнҗирлиридә тәңшәш елип берип, уйғур ели билән мунасивәт орнитиштин сақлиниши керәклики тәвсийә қилинған.

Мақалида йәнә мундақ дейилгән: “шинҗаңдики кишилик һоқуқ дәпсәндичиликини бир тәрәп қилиш америка сияситидики икки партийә ортақлишалиған интайин кәм учрайдиған бир саһә. Шуңа алдимизда йәнә техиму көп җаза вә сода тәдбирлири һәр вақит оттуриға чиқиши мумкин. Йеңи сиясәтләр оттуриға чиққанда, америка карханилири диққәт қилиши керәк. Ширкәтләр тәминләш зәнҗирилирини әстайидиллиқ билән тәкшүрүп, уларниң шинҗаң яки шуниңға охшаш башқа ишчилар һоқуқи яки кишилик һоқуқ мәсилиси билән алақиси йоқлиқиға капаләтлик қилиши керәк.”

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт