Amérikaliq soda mutexessiliri amérika shirketlirini Uyghur mejburiy emgikidin hezer eyleshke chaqirghan

Amérikadiki aldinqi qatarda turidighan soda mutexessislirining kündilik xewer analizliri we tehlilliri élan qilinidighan kespiy tor betlerdin “JD Supra” namliq tor bette élan qilin'ghan bir maqalide, amérika shirketliri “Uyghur mejburiy emgikining aldini élish qanuni” boyiche ish körüp, Uyghur mejburiy emgikige chétilip qalmasliqqa chaqirilghan.

“‛Uyghur mejburiy emgikining aldini élish qanuni‚ amérika karxanilirigha teminlesh zenjiridiki kishilik hoquq mesilisini bir terep qilish heqqide bésim chüshüridu” dep mawzu qoyulghan bu analiz maqaliside körsitilishiche, 2021-yili 12-ayning 23-küni, amérika prézidénti jow baydénning imza qoyushi bilen resmiy qanun'gha aylan'ghan bu qanun Uyghur élida ishlepchiqirilghan tawarlarning amérikagha import qilinishini ünümlük chekleydiken hemde Uyghur éli bilen alaqisi bar shirketlerni jazalinish xewpi bilen yüzleshtüridiken.

Bolupmu teminlesh zenjirliri sewebidin Uyghur éli bilen munasiwiti bar bolghan amérika shirketliri, jümlidin quyash énérgiyesi we toqumichiliq sana'iti qatarliq mejburiy emgek éhtimalliqi yüksek sahelerde tijaret qilidighan amérika shirketliri bu qanunning cheklimisige biwaste uchraydiken.

Shunga bu analiz maqaliside amérikaning quyash énirgiye we toqumichiliq sahesidiki shirketlirige “Uyghur mejburiy emgikining aldini élish qanuni” ning yolgha qoyulushini estayidil közitish, shuning bilen bir waqitta derhal teminlesh zenjirliride tengshesh élip bérip, Uyghur éli bilen munasiwet ornitishtin saqlinishi kérekliki tewsiye qilin'ghan.

Maqalida yene mundaq déyilgen: “Shinjangdiki kishilik hoquq depsendichilikini bir terep qilish amérika siyasitidiki ikki partiye ortaqlishalighan intayin kem uchraydighan bir sahe. Shunga aldimizda yene téximu köp jaza we soda tedbirliri her waqit otturigha chiqishi mumkin. Yéngi siyasetler otturigha chiqqanda, amérika karxaniliri diqqet qilishi kérek. Shirketler teminlesh zenjirilirini estayidilliq bilen tekshürüp, ularning shinjang yaki shuninggha oxshash bashqa ishchilar hoquqi yaki kishilik hoquq mesilisi bilen alaqisi yoqliqigha kapaletlik qilishi kérek.”