Xelq'ara kishilik hoquqni közitish teshkilati awstraliyeni Uyghur mejburiy emgiki asasida yasalghan tawarlarni chekleshke chaqirdi

Muxbirimiz irade
2021-02-09
Share

8-Féwral küni, kishilik hoquqni közitish teshkilati awstraliye kéngesh palatasining tashqi ishlar, mudapi'e we soda qanun komitétigha doklat sunup, awstraliye hökümitidin mejburiy emgek bilen yasalghan tawarlarni import qilishni toxtitishqa munasiwetlik qanunlarni kücheytishni telep qildi.

Kishilik hoquqni közitish teshkilatining awstraliye diréktori éli'in pérson bayanatta mundaq dégen: "Shinjangdiki Uyghur we bashqa musulman az sanliq milletlerning mejburiy emgekke séliniwatqanliqigha a'it ishenchlik melumatlar bar. Awstraliye bashqa döletler bilen birliship, shinjang we bashqa jaylardin mejburiy emgek bilen yasalghan import tawarlirini toxtitish buyruqi chüshürüshi kérek".

Melum bolushiche, hazir awstraliye parlamént komitéti kéngesh palata ezasi rékis patrik teripidin otturigha qoyulghan Uyghur mejburiy emgiki asasida ishlepchiqirilghan mehsulatlarni chekleshke munasiwetlik qanun layihesini körüp chiqiwatqaniken.

Kishilik hoquqni közitish teshkilati mezkur qanun layihesining qobul qilinishi kéreklikini tekitlep mundaq dégen: "Awstraliye hökümiti shinjangni mejburiy emgek xewpi yuqiri rayon qilip békitishi, hemde shinjangdin kirgen teyyar mehsulatlar yaki u yerdiki xam matériyallar asasida ishlepchiqirilghan tawarlarning hemmiside mejburiy emgek barliqidin ibaret perezni otturigha qoyushi kérek."

Ular yene awstraliye tashqi ishlar we soda ministirliqini awstiraliyediki soda-sana'etchiler we ammiwi teshkilatlar bilen söhbetliship, ularning Uyghur élida soda qilishning xetirige bolghan tonushini östürüshke we shirketlerni Uyghur mejburiy emgikige chétishliq shirketler bilen tijaret qilmasliqqa ilhamlandurushqa chaqirghan.

Yéqinda, amérika importni kontrol qilish tedbirlirini kücheytip, Uyghur élidin kélidighan barliq paxta we pemidur mehsulatlirini chekligenidi. Amérika yene amérikaliq import qilghuchilardin rayondin import qilin'ghan her qandaq tawarning mejburiy emgektin xaliy teminlesh zenjiridin kelgenlikini ispatlashni telep qilidighan bir qanun layihesini maqullash basquchida turmaqta. 2021-Yili 1-ayda, en'gliye we kanada öz karxanilirining Uyghur élidiki kishilik hoquq depsendichilikige chétilip qélishi we uningdin payda élishining aldini alidighanliqini jakarlidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet