Aqsu sana'et baghchisining ghayet zor ishlepchiqirish miqdari guman qozghimaqta
2022.03.01
Xitay hökümiti bashqurishidiki “Aqsu axbarat tori” ning yéqinqi xewiride éytilishiche, aqsu wilayiti teweside köplep berpa qilin'ghan “Sana'et baghcha sistémisi” ning 2022-yili 1-aydiki omumiy mehsulat qimmiti besh yérim milyard som (texminen 900 milyon amérika dolliri) din éship ketken. Bu san ötken yilqi sewiyedin 54 pirsent yuquri bolghan.
Xewerde éytilishiche, mezkur sana'et baghcha rayonidiki “Shingfa ximiye sana'iti cheklik shirkiti” gila bir milyard som meblegh sélin'ghan bolup, yiligha 30 ming tonna dimétil sulfoksid (Dimethyl sulfoxide/ DMSO) ishlepchiqarghan. Melum bolushiche, buning bir tonnisi adette 50 ming som etrapida sétilidiken. Shirket diréktori lyu yongjé bu heqte söz qilip: “Bu yil mehsulat miqdarini 50 ming tonnigha yetküzimiz” dégen. Uningdin bashqa aqsu toqumuchiliq sheherchiside yüzligen xitay shirketliri toqumuchiliq we kiyim-kéchek ishlepchiqirishi bilen shughullinidighan bolup, mehsulatlar her küni ghayet zor yük aptomobilliri arqiliq bashqa jaylargha yötkep kétilidiken.
Bunche zor kölemlik ishlepchiqirish bazisi we mehsulat miqdarining qisqighine waqit ichide wujutqa kélishini, yene kélip xeterlik we japaliq bolghan ximiye sana'iti ishlepchiqirishini bezi analizchilar Uyghur diyarida izchil dawam qiliwatqan mejburiy emgek qilmishi bilen baghlinishliq bolushi mumkin, dep qarimaqta iken. Yene kélip Uyghur diyarida yillardin buyan dawam qiliwatqan “Éshinche emgek küchlirini xizmetke orunlashturush” sho'arida izchil yerliridin ayrilip qalghan déhqanlar we ishsiz Uyghur yashliri erzan bahaliq emgek küchi süpitide ashu xildiki zawutlargha erzan bahaliq emgekchi bolup ewetiliwatqan idi.