Amérika xelq'ara diniy erkinlik komitéti: "Xitay ishlepchirishni eslige keltürüshte qullar emgikini ishlitiwatidu"

Muxbirimiz erkin
2020-04-03
Élxet
Pikir
Share
Print

Xitayning ishlepchirishni eslige keltürüshte Uyghurlardin qullar emgiki süpitide paydiliniwatqanliqi ilgiri sürüldi.

Amérikadiki "Katolik xewerliri agéntliqi" ning 2-aprél xewiride qeyt qilishiche, amérika diniy erkinlik komitétining mu'awin re'isi nadine ménza bu yilning bashliri xitayda tajsiman wirusning partlishi bilen teng Uyghur ishlemchilirining sanimu zor derijide ashqanliqini bildürgen. U mezkur agéntliqqa qilghan sözide: "2020-Yilining bashliri xitayda yéngi tajsiman wirusning partlishigha egiship zawutlarda ishleshke lagérlardin tizimgha aldurghan yaki 'oqush pütürgen' Uyghurlarning sanida zor derijide éshish ehwali körüldi," dégen.

Nadine ménza bu sözlerni xitay hökümiti yash Uyghur emgek küchlirini Uyghur diyarining ichi-sirtidiki xitay zawut-karxanilirigha türkümlep yötkewatqan mezgilde qildi. U yene amérika dölet mejlisi xitay ishliri komitétining yéqinda élan qilghan doklatini neqil keltürüp: "Eger bu doklat toghra bolsa, bu xitay hökümitining az sanliq millet qullar emgiki etkeschiliki qiliwatqanliqini körsitidu," dégen.

Xitay ishliri komitétining yéqinda élan qilin'ghan mezkur doklatida xitayning lagér tutqunlirini zawut-karxana, yéza-igilik meydanlirida qandaq mejburiy emgekke séliwatqanliqi heqqide tepsiliy toxtalghan.

Xitay hökümiti bu yil 2-ayda korona wirusi pütün xitayni qaplap, her qaysi jaylar omumyüzlük karantin'gha élin'ghan bir mezgilde Uyghur emgek küchlirini keng kölemlik yötkeshke bashlighan. 2-Ayning 22-küni tunji türkümde xotendin 171 Uyghur yuqum rayoni bolghan changshagha yötkelgen idi. Nadine ménzaning tekitlishiche, "Xitayning bir milyon adem jaza lagérlirida tutup turuluwatqan shinjangda aran 76 yuqumdar bayqaldi, dep élan qilishigha ishenmek bek müshkül" iken.

Toluq bet