Amérika tamozhna idarisi import shirketlirige xet yézip, “Uyghur mejburiy emgikini cheklesh qanuni” ning ijra qilinidighanliqini uqturghan

Muxbirimiz erkin
2022-04-29
Share

Amérika tamozhna we chégra qoghdash idarisi CBP amérikadiki import shirketlirige xet yézip, “Uyghur mejburiy emgikining aldini élish qanuni” ning bu yil 21-iyundin bashlap ‍ijra qilinidighanliqi, Uyghur élide ishlepchiqirilghan mehsulatlarning mejburiy emgek mehsulati emeslikini ispatlash telep qilinidighanliqini élan qilghan.

Amérika taratqulirining xewer qilishiche, tamozhna we chégra qoghdash idarisi bu heqtiki uqturushida mezkur qanun resmiy ijra qilinishtin burun “Import shirketlirige xet yézip bu qanunning tetbiqlinish obyéktidiki burun import qilinip kelgen mehsulatlargha qarita import qilghuchilarni teminat zenjiridiki mejburiy emgekke chétishliq mesililerni waqtida hel qiliwétishke ündeydiken”.

Amérika prézidénti jow baydén ötken yili 12-ayda imzalighan mezkur qanunda amérika tamozhna we chégra qoghdash idarisi komissarining “Import qilghuchilarning qanundiki konkrét teleplerni beja keltürüshi, éniq we qayil qilarliq deliller bilen mal, mehsulat, tawar yaki eshyalarning mejburiy emgekte ishlepchiqirilmighanliqini qarar qilishi” telep qilin'ghanidi.

Melum bolushiche, uqturushta yene barliq shirketlerning teminat zenjiride buyruq bilen ishlitish, ishchi ariyetke élip ishlitish, bala ishchilarni zorluq bilen yaki mejburiy ishlitishni ‍öz ichige alghan mejburiy emgektin xali bolushigha kapaletlik qilishi éniq otturigha qoyulup, bularning amérikagha import qilin'ghan mehsulatlarni ishlepchiqirishta ishlitilishke bolmaydighanliqi tekitlen'gen. Uqturushta körsitilishiche, buningdin burun, shirketlerning teminat zenjirini derhal we aktipliq bilen közdin kechürüp chiqishi telep qilinidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet