Уйғур аптоном районлуқ даириләр уйғур мәҗбурий әмгикиниң мәвҗутлиқини йәнә инкар қилишқа урунди
Уйғур аптоном районлиқ һөкүмәт 3-июн бейҗиңда 10-қетимлиқ ахбарат йиғини өткүзүп, уйғур мәҗбурий әмгикиниң мәвҗутлиқини йәнә инкар қилған.
-
Мухбиримиз әркин
2021-06-04 -
-
-
Уйғур аптоном районлиқ һөкүмәт 3-июн бейҗиңда 10-қетимлиқ ахбарат йиғини өткүзүп, уйғур мәҗбурий әмгикиниң мәвҗутлиқини йәнә инкар қилған. Даириләрниң ейтишичә, “шинҗаңда аз санлиқ милләтләрниң мәҗбурий әмгәккә селинғанлиқи пүтүнләй төһмәт” икән. Икки саәт давамлашқан йиғинға һөкүмәт әмәлдарлирини вә аталмиш санаәт саһәсиниң вәкиллирини өз ичигә алған 10 киши қатнашқан.
“җәнубий хитай әтигәнлик почтиси” гезитиниң хәвәр қилишичә, йиғинда һуҗум нишани америкаға қаритилған болуп, уйғур аптоном районлуқ һөкүмәтниң баянатчиси шуй гуйшяң мәҗбурий әмгәк “ғәрбтики хитайға қарши күчләр ойнаватқан козер” дегән.
Хәвәрдә ейтилишичә, йиғинда даириләр мухбирларға ақсудики “хуафу тоқумичилиқ завути” ниң ишчиси әкбәр турахунни өз ичигә алған 6 нәпәр уйғур ишчиниң ведийосини қоюп бәргән болуп, улар өзлириниң мәҗбурий ишләватқанлиқини рәт қилған. “хуафу тоқумичилиқ шеркити” уйғурларни мәҗбурий шләткәнлики сәвәблик американиң җазалишиға учриған иди.
Шу гуйшяң, б д т әмәлдарлириниң районни зиярәт қилип, “һәқиқи әһвални өз көзи билән көрүшини қарши алидиғанлиқи” ни билдүргән болсиму, бирақ “шинҗаңда мәвҗут болмиған ирқий қирғинчилиқ яки мәҗбурий әмгәкни тәкшүрүшниң һечқандақ асаси йоқ” дегән. Хитай һөкүмити б д т ниң уйғур елида чәклимисиз тәкшүрүш илип беришини рәт қилип, униңға изчил алдинқи шәрт қоюп кәлди. Өткән қетим явропа дипломатлириниң уйғур елини зиярәт қилип, илһам тохти билән көрүшүш тәлипини рәт қилған иди.