Уйғур мәҗбурий әмгики америка-хитай мунасивитиниң “яра еғизи” болуп қалмақта

Мухбиримиз әзиз
2022.06.07
Share on WhatsApp
Share on WhatsApp

Нөвәттә барғансери йириклишип меңиватқан америка-хитай мунасивитиниң мәркизий нуқтисидики баш тема уйғур дияридики “заманиви қуллар әмгики” дәп атиливатқан мәҗбурий әмгәк қилмиши болуватқанлиқи мәлум. “блумберг хәвәрлири” ниң 6-июндики обзорида бу нуқта алаһидә тәкитләнди.

Хәвәрдә ейтилишичә, америка президенти җов байден нөвәттики америка-хитай мунасивитидә мәҗбурий әмгәк мәсилисини мәркизий орунға қоюватқан болуп, бу сәвәбтин дуняви тәминләш зәнҗиридә ғайәт зор өзгиришләр барлиққа кәлмәктикән. 21-Июндин башлап иҗра қилинидиған “уйғур мәҗбурий әмгикиниң алдини елиш қануни” уйғур дияридин келидиған һәрқандақ буюмниң импорт қилинишини мәни қилидиған болуп, бу хил чәклимә таки шу мәһсулат мәҗбурий әмгәк билән ишләнмигәнликини испатлап берәлигүчә күчкә игә болидикән. Бу сәвәбтин дунядики икки зор иқтисад саһиби оттурисида көрүлүватқан һәмдә барғансери әвҗигә чиқиватқан бу “яра еғизи” нөвәттә көплигән тәрәпләрни бу мәсилидә америка яки хитайниң бирини таллашқа үндимәктә икән.

Һалбуки, америка һөкүмити бу һәқтә бәзи әмәлий тәдбирләрни еливатқанда хитай һөкүмити уйғур диярини сиясий вә иқтисадий җәһәттин хитай билән техиму чәмбәрчәс һалда бир гәвдиләштүриветиш үчүн техиму көп вә қаттиқ қоллуқ васитилирини ишқа салмақта икән. Уйғур дияриға йеңидин әвәтилгән партийә секретари ма шиңруйниң “йезилар билән шәһәрләрниң тәрәққиятини бирләштүрүш”, “әмгәк күчи муҗәссәмләшкән кәсипләрни раваҗландуруш” қатарлиқ лайиһилири әмәлийәттә район миқясида мәҗбурий әмгәк қилмишиниң техиму юғури пәллигә чиқидиғанлиқидин бешарәт бәрмәктикән.

Әнә шу хил реаллиқни көздә тутқан һалда америка кеңәш палатасиниң әзаси марко рубийо 6-июн күни америка президенти җов байденға очуқ мәктуп йоллап 21-июндин башлап иҗра қилинидиған “уйғур мәҗбурий әмгикиниң алдини елиш қануни” ни қәтийлик билән йолға қоюшни тәләп қилған.

Дөләт мәҗлисиниң төт нәпәр әзаси имза қойған бу очуқ хәттә: “бу қанун иҗра қилинишқа башлиған һаман шинҗаңниң ичи вә сиртидики мәҗбурий әмгәк билән ишләнгән һәрқандақ мәһсулатниң импорт қилинишини мәни қилиши лазим. Бу һазир һәрқандақ вақиттикидинму муһим. Хитай һөкүмити вә хитай компартийәси америка қошма штатлириниң һечқачан бу хилдики қирғинчилиққа вә инсанийәткә қарши җинайәтләргә шерик болмайдиғанлиқини чүшинивелиши лазим” дейилиду.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.