Uyghur mejburiy emgiki amérika-xitay munasiwitining “Yara éghizi” bolup qalmaqta

Muxbirimiz eziz
2022.06.07
Share on WhatsApp
Share on WhatsApp

Nöwette barghanséri yirikliship méngiwatqan amérika-xitay munasiwitining merkiziy nuqtisidiki bash téma Uyghur diyaridiki “Zamaniwi qullar emgiki” dep atiliwatqan mejburiy emgek qilmishi boluwatqanliqi melum. “Blumbérg xewerliri” ning 6-iyundiki obzorida bu nuqta alahide tekitlendi.

Xewerde éytilishiche, amérika prézidénti jow baydén nöwettiki amérika-xitay munasiwitide mejburiy emgek mesilisini merkiziy orun'gha qoyuwatqan bolup, bu sewebtin dunyawi teminlesh zenjiride ghayet zor özgirishler barliqqa kelmektiken. 21-Iyundin bashlap ijra qilinidighan “Uyghur mejburiy emgikining aldini élish qanuni” Uyghur diyaridin kélidighan herqandaq buyumning import qilinishini men'i qilidighan bolup, bu xil cheklime taki shu mehsulat mejburiy emgek bilen ishlenmigenlikini ispatlap béreligüche küchke ige bolidiken. Bu sewebtin dunyadiki ikki zor iqtisad sahibi otturisida körülüwatqan hemde barghanséri ewjige chiqiwatqan bu “Yara éghizi” nöwette köpligen tereplerni bu mesilide amérika yaki xitayning birini tallashqa ündimekte iken.

Halbuki, amérika hökümiti bu heqte bezi emeliy tedbirlerni éliwatqanda xitay hökümiti Uyghur diyarini siyasiy we iqtisadiy jehettin xitay bilen téximu chemberches halda bir gewdileshtüriwétish üchün téximu köp we qattiq qolluq wasitilirini ishqa salmaqta iken. Uyghur diyarigha yéngidin ewetilgen partiye sékrétari ma shingruyning “Yézilar bilen sheherlerning tereqqiyatini birleshtürüsh”, “Emgek küchi mujessemleshken kesiplerni rawajlandurush” qatarliq layihiliri emeliyette rayon miqyasida mejburiy emgek qilmishining téximu yughuri pellige chiqidighanliqidin bésharet bermektiken.

Ene shu xil ré'alliqni közde tutqan halda amérika kéngesh palatasining ezasi marko rubiyo 6-iyun küni amérika prézidénti jow baydén'gha ochuq mektup yollap 21-iyundin bashlap ijra qilinidighan “Uyghur mejburiy emgikining aldini élish qanuni” ni qet'iylik bilen yolgha qoyushni telep qilghan.

Dölet mejlisining töt neper ezasi imza qoyghan bu ochuq xette: “Bu qanun ijra qilinishqa bashlighan haman shinjangning ichi we sirtidiki mejburiy emgek bilen ishlen'gen herqandaq mehsulatning import qilinishini men'i qilishi lazim. Bu hazir herqandaq waqittikidinmu muhim. Xitay hökümiti we xitay kompartiyesi amérika qoshma shtatlirining héchqachan bu xildiki qirghinchiliqqa we insaniyetke qarshi jinayetlerge shérik bolmaydighanliqini chüshiniwélishi lazim” déyilidu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet