Uyghur mejburiy emgikini ayaghlashturush birleshmisi mishél bachélétni kishilik hoquq doklatini élan qilishqa chaqirghan

Muxbirimiz jewlan
2022.06.08
Share on WhatsApp
Share on WhatsApp

Aldinqi ayda b d t kishilik hoquq aliy komissari mishél bachélétning xitay we Uyghur rayonidiki ziyariti omumyüzlük tenqidke uchrighandin kéyin, Uyghur mejburiy emgikini ayaghlashturush birleshmisi mishél bachélétni Uyghur we bashqa türkiy xelqlerge munasiwetlik kishilik hoquq doklatini élan qilishqa chaqirghan.

Mezkur birleshme öz tor bétide bergen bayanatida, mishél bachélétni Uyghur rayonidiki zamaniwi qulluqqa munasiwetlik köpligen ispatlarni bu doklatqa kirgüzüshke, shu arqiliq nurghun shirketlerge bu qilmishqa qarshi küresh qilishqa ündeydighan tekliplerni bérishke dewet qilghan.

Bu bayanatta körsitilishiche, xelq'ara emgekchiler teshkilati mutexessisler guruppisi xitayning mejburiy emgek siyasitige küchlük diqqet qilip kelgen. Uyghur mejburiy emgikini ayaghlashturush birleshmisimu bu mesilide b d t kishilik hoquq ishxanisi bilen birdeklikni saqlash üchün Uyghurlardiki mejburiy emgek, jümlidin xelq'ara shirketlerning buninggha shérik bolghanliqi toghruluq mexsus doklat teyyarlap mishél bachélétqa sun'ghan we uning bu doklatni élan qilip, xitayning bu qilmishni ashkara eyibleshke chaqirghan.

Melumatlardin qarighanda, dunyadiki paxtining 20 pirsenti, quyash énérgiyesi taxtisining 45 pirsenti Uyghur rayonidin chiqidiken we bu mehsulatlar mejburiy emgek bilen chétishliq iken.

Uyghur mejburiy emgikini ayaghlashturush birleshmisi mishél bachélétni Uyghur rayonigha munasiwetlik kishilik hoquq doklatini, jümlidin qul emgikige chétishliq ispatlarni waqtida élan qilishqa chaqirish bilen birge, köpligen organlar, hökümetler we karxana orunlirini derhal heriket qollinip, Uyghur rayonidiki mejburiy emgek krizisini ayaghlashturushqa ündigen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.