Uyghurlar diyaridiki mejburiy emgek dawamliq eyiblendi

Muxbirimiz eziz
2020-06-17
Élxet
Pikir
Share
Print

Xitay hökümitining "Namratliqtin qutuldurush" namida Uyghur yashlirini we lagér mehbuslirini herqaysi jaylardiki xitay zawutlirida erzan bahaliq emgek küchige aylanduruwélishi herqaysi sahening küchlük tenqidige duch kelgenidi. 15-Iyun küni "Wakaletsiz milletler teshkilati" bayanat élan qilip "Sherqiy türkistandiki kiyim-kéchek zawutliri mejburiy emgek bedilige mangmaqta" dep körsetti.

Bayatta körsitilishiche, nöwette yüzligen dunyawi markilar Uyghurlar diyaridin paxta we kiyim-kéchek mehsulatlirini import qilmaqtiken. Emma bularning keynige yoshurun'ghan milyonlarche kishining lagérlar bilen bolghan baghlinishi dunyaning neziridin chette qalmaqtiken.

"Jenubiy xitay seher géziti" de élan qilin'ghan bu heqtiki tepsiliy xewerde "Uchimizdiki kiyimlerdin az dégendimu biri Uyghurlarning mejburiy emgiki bedilige pütken bolushi mumkin" déyilidu. Awstraliye istratégiyelik siyaset inistutining tetqiqatchisi néysén rusér buningdiki eng muhim amil bolghan teminat zenjiri heqqide toxtilip "Xitay bilen paxta sodisi qilghanliki kishi Uyghurlardin xaliy bolghan mejburiy emgekni tesewwur qilmisimu bolidu" deydu.

Maqalida körsitilishiche, nöwette amérika hökümiti xitay bilen bolidighan kiyim-kéchek mehsulatliri sodisigha bir qatar cheklimilerni qoyushni bashlighan bolup, yéqinda maqullan'ghan "Uyghur kishilik hoquq siyasiti qanun layihesi" mu mushu xildiki mejburiy emgekni qet'iy men'i qilish heqqide toxtalghan. Emma xitayning dunya boyiche paxta bahasi eng erzan rayon bolup qélishi yenila nurghunlighan xelq'araliq shirketlerni bu jaygha köz tikishke ündimekte iken. Emma xitaydiki paxta mehsulatining 80 pirsenttin köprekining Uyghurlar diyaridin kélidighanliqi bolsa tebi'iy halda Uyghurlarni bu xildiki teminat zenjirige baghlan'ghan mejburiy emgekke chétip turmaqtiken.

Nöwette Uyghurlar duch kéliwatqan omumiy basturush tüpeylidin Uyghurlarning eng eqelliy heqlirining depsende qiliniwatqanliqi dunyagha köplep melum bolmaqta iken. Emma xitaydiki bir qisim zawutlar xelq'araning közini boyash üchün Uyghur ishchilarni yurt-makanliridin yötkep kélip mejburiy emgekke salmaqtiken. "Emgekchiler heqliri birleshmisi" ning re'isi skot nowa bu heqte toxtilip "Bu hal nöwette dunyadiki shirketler üchün bir qétimliq sinaq bolmaqta. Ularning bu xildiki qilmishlargha qandaq mu'amilide bolushini pat yéqinda körimiz" dégen.

Toluq bet