"Uyghur mejburiy emgikining aldini élish qanun layihesi" amérika kéngesh palatasi tashqiy munasiwetler komitétida awazdin ötken

Muxbirimiz irade
2021-06-24
Share
Photo: RFA

24-Iyun küni "Uyghur mejburiy emgikining aldini élish qanuni" layihesi amérika kéngesh palatasi tashqiy munasiwetler komitétida awazdin ötken.

Mezkur qanun layihesini amérika kéngesh palata ezasi marko rubiyo we kéngesh palata ezasi jéf mérkléy birliship tonushturghan bolup, u bu yil 4-ayda awam palatasi tashqiy ishlar komitétida maqullan'ghan idi.

Kéngesh palata ezasi marko rubiyo bu munasiwet bilen özining resmiy tor béـtide bayanat élan qilip, bu layihening kéngesh palata tashqiy munasiwetler komitétitidin ötkenlikini tebrikligen. U buni xitay hökümitining Uyghurlargha yürgüzüwatqan irqiy qirghinchiliqi we insaniyetke qarshi jinayitidin payda élishini chekleshtiki muhim bir qedem, dep bahalighan.

U yene mundaq dégen: "Biz xitay kompartiyesining insaniyetke qarshi élip bériwatqan jinayi qilmishlirigha köz yumalmaymiz. Mejburiy emgek bilen yasalghan mehsulatlarning dölitimizning teminlesh zenjirige kirishining aldini élish üchün choqum qanun chiqirishimiz kérek. Bu qanun layihesining emdi kéngesh palatasi teripidin tézdin maqullishini ümid qilimen."

Kéngesh palatasi tashqiy munasiwetler komitétining ezasi jéf mérkléy mundaq dégen: "Amérika irqiy qirghinchiliq aldida süküt qilalmaydu. Biz Uyghur mejburiy emgekning aldini élish qanunini maqullap, bu mehsulatlarning import qilinishini cheklishimiz we bu irqiy qirghinchiliqni sadir qilghuchilarni jawabkarliqqa tartish üchün barliq tirishchanliqlarni körsitip heriketke ötishimiz kérek."

Amérikadiki Uyghur kishilik hoquq qurulushimu bügün "Uyghur mejburiy emgikining aldini élish qanuni" layihesining kéngesh palatasi tashqiy munasiwetler komitétitidin ötkenlikini tebrikligen. Mezkur teshkilatning ijra'iye diréktori ömer qanat bayanatida kéngesh palata tashqiy ishlar komitéti ezalirigha rehmitini bildürüsh bilen birge bu layiheni emdi resmiy qanun'gha aylandurup, Uyghurlarning hoquqini kapaletke ige qilidighan waqit kelgenlikini tekitligen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet