Uyghur aptonom rayoni da'iriliri “Uyghur mejburi'i emgikining aldini élish qanuni” ning ijra qilinishigha inkas bildürdi

Muxbirimiz erkin
2022.06.27
Share on WhatsApp
Share on WhatsApp

Uyghur aptonom rayoni da'iriliri ötken heptining axiri mexsus axbarat yighini ötküzüp, amérikaning 21-iyundin bashlap resmiy ijra qilishqa bashlighan “Uyghur mejburiy emgikining aldini élish qanuni” gha inkas bildürgen. Melum bolushiche, prézidént baydén ötken yili 12-ayda imza qoyghan bu qanunning ötken heptidin bashlap resmiy ijra qilinishi xitayning Uyghur élidiki shirketlirinila emes, uning memliket miqyasidiki shirketlirinimu alaqzade qiliwetken. Uyghur aptonom rayonluq hökümetning bayanatchisi shü guyshiyang 24-iyun ötküzgen axbarat yighinida, amérikaning bu qanunni ijra qilishtiki meqsitini “Shinjangda ishsizliq peyda qilip, shinjangning muqimliqigha buzghunchiliq qilish” dep eyibligen.

Lékin amérika dölet mejlisining her ikki palatasida mutleq köp awazning qollishi bilen maqullan'ghan bu qanun, xitayning milyonlighan Uyghurni a'ililiridin ayrip, xitayning Uyghur éli we ichkiri ‍ölkiliridiki karxanilarda heqsiz yaki erzan bahaliq emgek küchi süpitide mejburiy ishlitishi, bu arqiliq xelq'ara mal teminlesh zenjirini zeherli'ishge qarshi chiqirilghan. Yéqinda xelq'ara emgek teshkilati uning Uyghurlar élidiki emgek siyasitining “Endishe qilarliq” ikenlikini éytqan. Lékin shü guyshiyang axbarat yighinida: “Bu, amérikaning kishilik hoquq namida xitayni cheklishi we bésishining küchiyishidur. Amérikaning bu herikitining qanun asasi yoq, ré'alliq bilen mas kelmeydu, eqilge sighmaydu, shundaqla özige paydisiz. Uning heqiqiy muddi'asi mejburiy ishsizliq peyda qilip, shinjangni muqimsizlashturush, xitayning ichki ishlirigha arilishish. Bu, xitayning tereqqiyatini chekleydighan gheyriy normal xahish” dégen.

Melum bolushiche, mezkur axbarat yighinida yene “Shinjang tibbi'iy uniwérsitétining tébabetchilik qurulushi téxnika instituti” ning mu'awin mudiri nurnisa ghalip, shinjang tereqqiyat tetqiqat merkizi” ning tetqiqatchisi xemit abduréxim, “Shinjang bash ishchilar uyushmisi” ning mu'awin re'isi chén jongku'en qatarliqlar da'iriler sözligen. Xemit abduréim özining “Qeshqer kona sheher nahiyeside kent ahalilirining yéza namratliqtin qutquzush séxigha kirip, déhqanlarning sana'et ishchilirigha aylan'ghanliqini körgenliki” ni éytqan. Lékin muxessisler éytishiche, xitay 2017-yildin bashlap Uyghur déhqanlirining yer-mülkini tartiwélip, ularni xitay zawutliridiki yalanga'ach emgek küchlirige aylandurghan iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet