Fransiye soti töt kiyim-kéchek shirkiti üstidin sunulghan Uyghur mejburiy emgek erzini qobul qilghan
2021.07.01
Fransiyediki bir sot mehkimisi yuniklo we zarani öz ichige alghan töt ataqliq kiyim-kéchek shirkitining Uyghur mejburiy emgikidin paydigha érishkenlikige a'it heq telep erzni qobul qilghan. Bu hazirgha qeder chet ellerde Uyghur mejburiy emgikidin paydigha érishish bilen eyiblinip échilghan tunji dawa bolup hésaplinidu.
Fransiye agéntliqining xewer qilishiche, parizh döletlik térorluqqa qarshi turush teptish mehkimisidiki sotchilar dölet halqighan shirketlerning insaniyetke qarshi turush jinayitige chétishliq ikenlikige da'ir erzni tekshürüshke bashlighanliqini delilligen.
Bu délo bu yil 4-ayda sherpa chiriklikke qarshi turush guruppisi, pakiz kiyim-kéchek herikitining fransiye tarmiqi, yawropa Uyghur instituti we xitay lagérida yétip chiqqan fransiyediki bir Uyghur ayalning erzige asasen turghuzulghan.
Fransiye agéntliqining xewiride éytilishiche, erzdarlar inditékis, ispaniyening zara shundaqla yuniklo, fransiyening dangliq kiyim-kéchek guruhi bolghan SMCP we dangliq ayaq kiyim shirkiti skechérni “Shinjang paxtisi” ishlitish bilen eyibligen.
Ötken yili nayké, yuniklo, H&N yaki adidasni öz ichige alghan bir qanche dangliq xelq'ara markilar bayanat élan qilip, “Shinjang paxtisi” ni ishletmeydighanliqini jakarlap, xitayning bayqut qilishigha uchrighan, hetta bezi shirketler bayanatini qayturiwalghan idi. Amérika hökümiti ilgiri bu dangliq xelq'ara markilarni Uyghur mejburiy emgikige chétilip qalmasliqini, uninggha chétilip qélishning iqtisadiy hem qanuniy jawabkarliqi bolidighanliqini agahlandurghan idi.