"Uyghur mejburiy emgikining aldini élish qanun layihesi" amérika kéngesh palatasida maqulluqtin ötti

Muxbirimiz irade
2021-07-15
Share

Amérika kéngesh palatasi Uyghur élida ishlepchiqirilghan herqandaq tawarning amérikagha kirishini chekleydighan "Uyghur mejburiy emgikining aldini élish qanun layihesi" ni maqullidi.

Roytérs agéntliqining xewirige qarighanda, 14-iyul küni awazgha qoyulghan bu layihe amérika kéngesh palatasida toluq qollash bilen awazdin ötken bolup, bu amérikaning xitay hökümitining Uyghurlargha qaratqan irqiy qirghinchiliqi we mejburiy emgikini cheklesh yolidiki muhim qedemlerning biri bolup hésablinidiken.

"Uyghur mejburiy emgikining aldini élish qanun layihesi" ni amérika kéngesh palata ezasi marko rubiyo we kéngesh palata ezasi jéf mérkléy birlikte tonushturghan. Sénator marko rubiyo bu heqtiki bayanatida mundaq dégen: "Biz xitay kompartiyesining insaniyetke qarshi élip bériwatqan jinayi qilmishlirigha köz yumalmaymiz, shundaqla herqandaq shirketing bu dehshetlik zulumgha shérik bolup payda élishigha yol qoymaymiz".

Sénator jéf mérkléy mundaq dégen: "Héchqandaq bir amérika shirkiti bu ziyankeshliklerdin payda almasliqi kérek. Héchqandaq amérikaliq istémalchi bilip-bilmey mejburiy emgek bedilige ishlepchiqirilghan mehsulatlarni sétiwalmasliqi kérek."

Mezkur qanun layihesi kéyinki qedemde amérika awam palatasida awazgha qoyulidiken, amérikadiki her ikki partiye ezaliri bu qanun layihesining yoqiri awaz bilen maqullinidighanliqini mölcherlimektiken.

Amérika hökümiti téxi yéqinda Uyghur éli we xitay tewesidiki jem'iy 14 shérketni Uyghurlargha qaritilghan irqiy qirghinchiliqta roli bar, dep jazalighan. Shundaqla yene Uyghur élidiki teminlesh zenjirlirige munasiwetlik yéngi soda körsetmisi élan qilip, amérika shérketlirini Uyghur élidiki mejburiy emgekke chétilip qélishtin qattiq agahlandurghan idi.

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet