Уйғурларниң мәҗбурий әмгәк мәсилисидә иттипақдашлар америка һөкүмитигә әгәшмәкчи

Мухбиримиз әзиз
2022.07.19
Share on WhatsApp
Share on WhatsApp

Америка қошма штатлири (а қ ш) ниң иттипақдашлири йеқинқи мәзгилләрдә охшимиған шәкилләрдә уйғур дияридики мәҗбурий әмгәк мәһсулатлирини чәкләш сепигә қошулуватқан болуп, әмдиликтә тәминләш зәнҗиридики бу әһвалға қарита “ғәрәзлик һалда билмәс болувелиш” ниң вақти өткәнлики алға сүрүлмәктикән.

Ройтерс агентлиқиниң 18-июлдики хәвиридә ейтилишичә, уйғур дияридики ирқий қирғинчилиқниң муһим мәзмунлиридин болған мәҗбурий әмгәк мәсилисигә қаритилған қанун лайиһәси иҗра қилинишқа киришкәндин буян америка әмгәк министирлиқи өз иттипақдашлиридин явропа иттипақи вә канада билән мәхсус сөһбәттә болуп, бу мәсилидә уларниңму тегишлик чариләрни қоллиниши һәққидә музакириләшкән. Бу хил һәмкарлиқ ишлириға мәсул америка әмәлдарлиридин си ли (Thea Lee) бу һәқтә мухбирларға сөз қилип “һазир бу ишлар кеңйиватиду. Канада, явропа иттипақи вә башқилар мушу йөнилишкә қарап меңиватиду. Әмди бизгә тәминләш зәнҗири мәсилисидә ‛бу ишларға чақчақ қилмаң‚ дәйдиған вақит кәлди” дегән. Америка ташқи ишлар министири антони билинкен әпәндиму июн ейида америка һөкүмитиниң мәҗбурий әмгәк мәсилисидә өз иттипақдашлири билән һәмкарлишидиғанлиқини билдүргәниди.

Мәлум болушичә, америка таможна вә чегра мудапиә идариси нөвәттә уйғур дияридики мәҗбурий әмгәккә бағлинишлиқ болғанлики мәһсулатларниң һәммисини мусадирә қилмақта икән. Әмма қуяш енергийә тахтиси ишләпчиқиридиған хитай ширкәтлиридин үчи һазирчә бу “қара тизимлик” кә елинмиған болуп, бу мәсилә америка һөкүмити җиддий ойлишиватқан ишлардин икән. Си ли бу һәқтә тохтилип әмгәк министирлиқиниң “қара тизимлики” нөвәттә барғансери зорийиватқанлиқини билдүргән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.